काठमाडौं (हाम्रो खेलकुद) – नेपाली राष्ट्रिय क्रिकेट टोलीका उपकप्तान दीपेन्द्र सिंह ऐरीले ओडिआई क्रिकेटमा १ हजार रन पूरा गरेका छन् ।

आइसिसी विश्वकप लिग टु अन्तर्गतको चौथो चरणको त्रिकोणात्मक सिरिजमा स्कटल्याण्डविरुद्ध खेलमा दीपेन्द्रले १ हजार रन पूरा गरेका हुन् ।

३०.२ ओभरमा मार्क वाटको बलमा १ रन लिदै दीपेन्द्रले १ हजार रन पूरा गरेका हुन् । दीपेन्द्रले ६३ ओडिआई खेलमा १ शतक र ३ अर्धशतकको सहयोगमा १ हजार रन पूरा गरेका हुन् ।

नेपालका लागि ओडिआईमा १ हजार रन पूरा गर्ने दीपेन्द्र पाँचौ खेलाडी हुन् । यसअघि कप्तान रोहितकुमार पौडेल, आरिफ शेख, आसिफ शेख, कुशल भुर्तेलले १ हजार रन पूरा गरिसकेका थिए । नेपालका लागि ओडिआईमा सर्वाधिक रन प्रहार गर्नेमा कप्तान रोहित शीर्ष स्थानमा छन् ।

नेपालले अहिले ३१ ओभरको समाप्तीमा १ सय ६१ रन बनाएको छ । क्रिजमा दीपेन्द्रको साथमा भीम सार्की रहेका छन् ।

नेपालले पहिलो विकेटका रुपमा २० बलमा १७ रनमा खेलिरहेका कुशल भुर्तेललाई गुमाएको थियो । कुशल र आसिफबीचमा समझदारी नबन्दा उनले रन आउटको सिकार हुनु पर्यो ।

दोस्रो विकेटका रुपमा नेपालले अर्का ओपर आसिफलाई ८ बलमा ८ रनमा गुमायो । तेस्रो विकेटका रुपमा नेपालले कप्तान रोहितकुमार पौडेललाई ३ रनमा गुमायो ।

भीमसँग चौथो विकेटका लागि बलियो साझेदारी गरिरहेका आरिफ शेख ५५ बलमा ३९ रन बनाउदै आउट भए । आरिफ र भीमले ९४ रनको साझेदारी गरेका थिए ।

नेपालले टस जितेर पहिले ब्याटिङ गरेको स्कटल्याण्डले दिएको ३ सय २४ को लक्ष्य पछ्याईरहेको छ ।