काठमाडौं(हाम्रो खेलकुद) – गण्डकी प्रदेशलाई हराउँदै बागमती टिबी शाह राष्ट्रिय यु-१६ प्रतियोगितामा शीर्ष स्थानमा उक्लिएको छ ।

बागमती सोमवार प्रदेशले गण्डकीलाई ८ विकेटले पराजित गरेको हो । १ सय ४ रनको सामान्य लक्ष्य बागमतीले २१.४ ओभरमा २ विकेट गुमाएर पूरा गर्यो ।

बागमतीका जोय थापाले ५३ बलमा ३ चौकाको सहयोगमा अविजित रहँदै सर्वाधिक ३४ रन जोडे । कप्तान प्रसिद्ध जैसी ३६ बलमा २० तथा ओपनर सुर्याशुं कोईराला १३ बलमा १८ रनमा आउट भए ।

गण्डकीका लागि सैलेश काफ्ले तथा सुशिल भुषालले समान १ विकेट लिए ।

त्यसअघि कालिन्चोक क्रिकेट मैदान सुर्खेतमा टस जितेर ब्याटिङ रोजेको गण्डकी ३८.१ ओभरमा १ सय ३ रनमा समेटियो ।

गण्डकीका कप्तान सुप्रिम सुनार ५८ बलमा ६ चौकासहित सर्वाधिक ३२ रनमा आउट भए । रिदम पाण्डेले २४ रन बनाउँनु बाहेक अन्य ब्याटरले दोहोरो अंकमा रन बनाउन सकेनन् ।

बागमतीका लागि सुशिल साउदले ४, शिवशक्ति महतोले ३ तथा इशान शाहले २ विकेट लिए ।

४ खेलमा ६ अंकका साथ बागमती शीर्ष स्थानमा उक्लिएको छ । समान अंक भएका मधेश र कोशीलाई बागमतीले रन रेटमा पछि पारेको छ । ४ खेलमा अंक विहिन गण्डकी भने तालिकाको पुछारमा छ ।

सिंगल राउन्ड रोविनमा हुने प्रतियोगितामा ७ प्रदेश सहभागी छ । शीर्ष दुई टोलीले जेठ ३१ गते फाइनल खेल्नेछन् ।

यो प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।