काठमाडौं (हाम्रो खेलकुद) – मधेश प्रदेशले टिबी शाह राष्ट्रिय यु-१६ प्रतियोगितामा कोशीलाई हराएको छ ।

सुर्खेतमा जारी प्रतियोगितामा सोमवार कोशी प्रदेशले मधेशसँग ६ विकेटको हार बेहोरेको हो । १ सय १६ रनको सामान्य लक्ष्य मधेशले १३.१ ओभरमा ४ विकेट गुमाएर पूरा गर्यो ।

मधेशको जितमा कप्तान परिमार्जन यादवले अर्धशतकीय ईनिङ खेले । परिमार्जनले २९ बलमा ४ चौका र ५ छक्कासहित सर्वाधिक ५४ रन जोडे ।

सुशान्त सिंह २२ बलमा ३ चौका र १ छक्काको २३ रनमा आउट भए । सन्तु मण्डल १० बलमा १६ रनमा अविजित रहे ।

कोशीका लागि कविराज खत्रीले २ तथा सुयोग भट्टराई र हार्दिक गोथियाले समान १ विकेट लिए ।

त्यसअघि विरेन्द्रनगर क्रिकेट मैदान सुर्खेतमा टस जितेर ब्याटिङ रोजेको कोशीले ४१.२ ओभरमा १ सय १५ रनमा अल आउट भयो ।

कोशीका अलिस मण्डलले ५० बलमा ५ चौकाको सहयोगमा सर्वाधिक ३० रन जोडे । कप्तान शिवान्स बजगाईं, सुगम बुढाथोकी र कविराज खत्री समान १३ रनमा आउट भए ।

मधेशका लागि अभय यादवले ४, नुमैर अहमदले ३, रोहन यादवले २ तथा सलमान अलिले १ विकेट लिए ।

५ खेलमा ६ अंक बटुलेको मधेश दोस्रो स्थानमा छ । समान खेलमा कोशी ६ अंकका साथ तेस्रो स्थानमा छ ।

सिंगल राउन्ड रोविनमा हुने प्रतियोगितामा ७ प्रदेश सहभागी छ । शीर्ष दुई टोलीले जेठ ३१ गते फाइनल खेल्नेछन् ।

यो प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।