काठमाडौं (हाम्रो खेलकुद) – आइसिसी विश्वकप लिग टु अन्तर्गत नेदरल्याण्ड्सविरुद्धको आजको खेलमा नेपाली टोलीका सोमपाल कामी र गुलशन झाले खेल्ने छैनन् ।

नेपाल क्रिकेट संघ(क्यान) अनुसार सोमपाल र गुलशन अभ्यासका क्रममा घाइते भएका हुन् । उनीहरुले आजको खेल तथा टि ट्वान्टी आई सिरिज समेत गुमाउने छन् ।

‘आईसीसीको कार्यक्रम अनुसार हाल स्कटल्याण्डमा सञ्चालन भइरहेको आईसीसी विश्वकप लिग २ प्रतियोगितामा सहभागिता जनाईरहेका नेपाली राष्ट्रिय टोलीका खेलाडीहरु सोमपाल कामी र गुल्सन झा प्रशिक्षण दौरान घाइते भएका छन् ,’ क्यानले भनेको छ।’

सोमपालको दायाँ हात तथा गुलशनको घुँडामा चोट लागेको बताइएको छ। त्यसैले दुबैले आजको खेल र टि ट्वान्टी सिरिज गुमाउनेछन्।

सोमपालले स्कटल्याण्डसँगको पछिल्लो खेलमा अर्धशतक बनाएका थिए। नेपालले स्कटल्याण्डसँग खेलेको टोलीबाट ३ परिवर्तन भएको छ । चोटग्रस्त सोमपाल र गुलशनसँगै आसिफ शेखलाई आराम दिएको छ। त्यसमा नन्दन यादव, बसिर अहमद र अनिल शाहले मौका पाएका छन् ।

नन्दनको ओडिआई यो डेब्यु खेल हो । गत महिना मात्र नन्दनले टि ट्वान्टी आईमा डेब्यु गरेका थिए । नन्दन नेपालका लागि ओडिआई खेल्ने ४२औं खेलाडी हुन् ।