एजेन्सी – स्कटल्याण्डका ओपनर ब्याटर जर्ज मुन्शे ओडीआईमा एकै खेलमा सर्वाधिक रन बनाउने एसोसिएट क्रिकेटर बनेका छन् । उनले आईसीसी विश्वकप लिग-२ मा नेदरल्यान्ड्सविरुद्ध १५० बलमा १४ चौका र ११ छक्कासहित १ सय ९१ रनको इनिङ खेल्दै उक्त दुर्लभ कीर्तिमान बनाएका हुन् ।

तीव्र गतिका बलर भिभियन किंग्माको बलमा बोल्ड भएपछि उनी दोहोरो शतक पूरा गर्ने पहिलो एसोसिएट क्रिकेटर बन्ने इतिहास लेख्नबाट ९ रनले पछि परे ।

यसअघि सन् २०१० मा आयरल्यान्डका पल स्टर्लिङले क्यानडाविरुद्ध बनाएको १७७ रन नै एसोसिएटबाट ओडीआईमा ब्यक्तिगत उच्च स्कोर हो ।

यद्यपी आयरल्याण्डले २०१७ मा भने टेस्ट मान्यता पाई सकेको छ । एसोसिएटतफै नै स्कटल्यान्डका पूर्व ब्याटर कलुम म्याकलेओडले २०१४ मा क्यानडाविरुद्ध १७५ रन बनाएका थिए । अमेरिका जसकरण मल्होत्राले २०२१ मा पपुवा न्युगिनीविरुद्ध १७३ रन बनाए ।

तर मुन्शेको उक्त शतकका बाबजुद स्कटल्यान्ड ४ विकेटले हार्न पुग्यो । जित्नलाई ३ सय ७० रनको विशाल लक्ष्य नेदरल्यान्ड्सले ४९.२ ओभरमा ६ विकेट गुमाउँदै पूरा गर्यो ।

नेदरल्यान्ड्सको जितमा हिरो बनेका ओपनर म्याक्स ओडाउडले १३० बलमा १३ चौका र ४ छक्कासहित १ सय ५८ रनको अविजित इनिङ खेले ।

ओडीआई इतिहासमा हालसम्म १२ दोहोरो शतक बनेका छन् । ती सबै टेस्ट टोलीका छन् । भारतीय ब्याटर रोहित शर्माले श्रीलंकाविरुद्ध २०१४ मा बनाएको २६४ रन ओडीआईमा एकै ब्याटरले खेलेको उच्च रन हो । रोहितले २०१७ मा श्रीलंकाविरुद्ध २०८ र २०१३ मा अष्ट्रेलियाविरुद्ध २०९ रन बनाएका थिए ।

रोहित शर्मा बाहेक ओडीआईमा भारतका ईशान किशन, शुभमन गिल विरेन्द्र सहभाग, सचिन तेन्दुलकर, पाकिस्तानका फखार जमान, श्रीलंकाका पाथुम निसांका, अष्ट्रेलियाका ग्लेन म्याक्सवेल र न्युजिल्यान्डका मार्टिन गुप्टिलले दोहोरो शतक हानेका छन् ।