एजेन्सी – आईसीसी विश्व टेस्ट च्याम्पियनसिप फाइनल २०२५ मा दोस्रो दिनपनि तीव्र गतिका बलर हाबी बनेका छन् । अष्ट्रेलिया १४४-८ को अवस्थामा दोस्रो दिनको खेल सकिएको छ ।

पहिलो इनिङमा ७४ रनले अग्रता लिएको साविक विजेता अष्ट्रेलिया समग्रमा २ सय १८ रनले अघिछ । अष्ट्रेलियाका मिचेल स्टार्क १६ र नाथन लायन १ रनबाट तेस्रो दिनको सुरुवात गर्नेछन् ।

दोस्रो दिनको खेल सकिनु भन्दा १० बल अगाडि एलेक्स केरी ५० बलमा ५ चौकासहित ४३ रनमा कागिसो रबाडाको बलमा एलबीडब्लू आउट भए । उनलाई दक्षिण अफ्रिकाले रिभ्यु लिदै प्लेभेलिन फर्काएको थियो । एक समय ७३-७ को अवस्थामा पुगेको अष्ट्रेलियालाई आठौं विकेटलाई केरी र स्टार्कले मिलेर ६१ रनको महत्वपूर्ण साझेदारी गरेका थिए ।

ओपनर मार्नस लाबुसेन २२, उस्मान खवाजा ६, क्यामरन ग्रिन शून्य, स्टिभ स्मिथ १३, ट्रविस हेड र बेउ वेबस्टर ९-९ रन बनाए । दक्षिण अफ्रिकाका कागिसो रबाडा र लुन्गी एनगिडीले ३-३ विकेट लिए ।

त्यसअघि दक्षिण अफ्रिका १ सय ३८ रनमा अल आउट हुँदै अग्रता लिदै खेलमा बलियो पकड जमाउने अवसर गुमाएको थिया । कप्तान टेम्बा बभुमा ३६ र डेभिड बेडिङघमले ४५ रन जोड्न बाहेक अन्यले राम्रो प्रदर्शन गर्न सकेनन् ।

अष्ट्रेलियाका कप्तान प्याट कमिन्सले ६ र मिचेल स्टार्कले २ सिवकेट लिए । त्यसअघि लर्ड्समा टस हारेर पहिला ब्याटिङको निम्तो पाएको अष्ट्रेलिया २ सय १२ रनमा अल आउट भएको थियो । अष्ट्रेलियाका स्टिभ स्मिथले ६६ र वेउ वेबस्टरले ७२ रन जोडे । दक्षिण अफ्रिकाका कागिसो रबाडाले ५ र मार्को यानसनले ३ विकेट लिए ।