काठमाडौं (हाम्रो खेलकुद) – राजविराज राजदेवी रोयल्स र तिरहुट टाइगर्स राजविराजमा जारी सातौँ सप्तरी प्राइड लिग (एसपिएल) को सेमिफाइनल प्रवेश गरेका छन् ।

वर्षाका कारण रोयल्स र राजगढ वारियर्सबीचको पहिलो खेल नतिजाविहिन रह्यो र दुबैले टोलीले अंक बाँडे ।

पबी स्कुल मैदानमा टस हारेर ब्याटिङ गरेको राजविराज राजदेवी रोयलले १४.१ ओभरमा ४ विकेट गुमाएर १ सय ५० रन बनाएको थियो। त्यसपछि लगातार वर्षा हुँदा खेल नतिजाविहिन टुंगिएको हो।

रोयल्सका लागि ओपनर रोहन बिकले सर्वाधिक ५१ रन बनाए । उनले उनले आक्रामक ब्याटिंङ गर्दै २४ बलमा ४ चौका र ४ छक्का प्रहार गरे। बसन्त यादवले अविजित २८, दिवान पुनले २०, अभिषेक तिवारीले अविजित १५ तथा प्रविन यादवले १४ रन जोडे।

राजगढ वारियर्सको बलिङमा रोशन यादवले सर्वाधिक ३ विकेट लिए। उनले ३ ओभरमा २९ रन खर्चिए। बिकी पासवानले १ विकेट लिए।

आजको दोश्रो खेलमा टाइगर्सले राइडर्सलाई १० विकेटले पराजित गर्यो।

वर्षाका कारण १२ ओभरमा घटाइएको खेलमा टस जितेर ब्याटिङ गरेको राइडर्सले ९.४ ओभरमा ५८ रन मात्र बनायो। ५९ रनको सामान्य लक्ष्य तिरहुट टाइगर्सले विकेट नगुमाई भेटायो।

टाइगर्सका ओपनर अविनाश कर्णले अविजित ३९ रन बनाए । उनले २३ बलमा ५ चौका र २ छक्का प्रहार गरे। अर्का ओपनर भोला शाह ११ रनमा अविजित रहे।

यसअघि टाइगर्सका बलर चित्र बहादुर बिष्ट एक्लैले ५ विकेट लिए । प्लेयर अफ द म्याच चित्रले ३ ओभरमा १२ रन खर्चे । यस्तै, अजय यादवले ३ विकेट लिए ।

राइडर्सको ब्याटिंङमा बिकी चौधरीले १५ र विशाल पटेलले १० रन बनाउनु बाहेक अन्य ब्याटरले दोहोरो अंकमा रन बनाउन सकेनन्।

८ दिन संचालन हुने प्रतियोगितामा ८ टोलीको सहभागिता छ । सहभागी टोलीलाई दुई समूहमा विभाजन गरिएको छ। फाइनल साउन १ गते हुनेछ।

सप्तरी क्रिकेट संघद्वारा आयोजित प्रतियोगिताको विजेता टिमले २ लाख र दोस्रो टोलीले १ लाख रुपैयाँ प्राप्त गर्नेछ।