एजेन्सी – भारतीय क्रिकेट टोलीका कप्तान सूर्यकुमार यादवले ओमानले एसीसी टी ट्वान्टी एसिया कपमा आफ्नो देशविरुद्ध अविश्वसनीय क्रिकेट खेलेको बताएका छन् । समूह ए को अन्तिम खेलमा जित्नलाई १ सय ८९ रनको लक्ष्य पछ्याएको ओमानले उत्कृष्ट प्रदर्शन गर्दै निर्धारित २० ओभरमा ४ विकेट गुमाएर १ सय ६७ रन बनाएको थियो ।

उक्त खेलपछि सूर्यकुमार यादवले भने, ‘मलाई लाग्छ ओमानले अविश्वसनीय ब्राण्डको क्रिकेट खेल्यो । मलाई थाहा छ ओमानको टोलीमा सुलु सर ( सुलक्षण कुलकर्णी) सर हुनुहुन्छ । उनी खाडुस छन् । साँच्चिकै उनीहरुको ब्याटिङ हेर्दा आनन्द लाग्यो ।’

ओमानले गत जुलाईमा भारतीय कुलकर्णीलाई कार्यवाहक मुख्य प्रशिक्षक नियुक्त गरेको थियो । मुम्बईका पूर्व क्रिकेटर उनी भारतीय घरेलु क्रिकेटका सफल प्रशिक्षक पनि हुन् ।

ओमानका अनुभवी अलराउण्डर आमिर कलिमले ४६ बलमा ७ चौका र २ छक्कासहित सर्वाधिक ६४ रन बनाए । हमाद मिर्जाले ३३ बलमा ५ चौका र २ छक्कासहित ५३ रन बनाए ।

दोस्रो विकेटलाई कलिम र मिर्जाले ९३ रनको साझेदारी गरेपछि ओमानलाई जित्नलाई अन्तिम १५ बलमा ४० रन चाहिँएको थियो । हर्षित रानाको बलमा हार्दिक पान्ड्याले उत्कृष्ट क्याच लिएपछि कलिम आउट भएपछि त्यसपछिका ब्याटरले राम्रो गर्न नसक्दा ओमान हार्न पुगेको थियो ।

यता ओमानका कप्तान जतिन्दर सिंहले आफ्नो टोलीको प्रदर्शनमा निकै गर्व गर्ने बताउँछन् ।

‘मलाई यस टोलीको प्रदर्शनमा अत्यन्तै गर्व छ । उनीहरुले योजना अनुसार खेले । कठिन परिस्थीतिमा उनीहरुले देखाएको चरित्रले मलाई निकै गर्व छ’, उनले भने ।

गतवर्ष टी-२० विश्वकपको पैसा नपाएको भन्दै पूर्वकप्तान अकिव इलियास, प्रतिक अथभले, खालिद कैल, मेहरान खान,नसिम खुसी, कश्याप प्रजापति, शोएब खान, जिशान मकसुद,आयन खान, बिलाल खान, कलिमुल्लाह र रफिउल्लाहले ओमान क्रिकेट छाडेका थिए । त्यसपछि टोली बाहिर रहेका जतिन्दरको कप्तानीमा ओमानले दोस्रो रोजाईका टोली सम्हाल्लेर टिम निर्माण गरेको थियो । उक्त टिमले लगातार उत्कृष्ट प्रदर्शन गर्दै आएको छ ।

यस प्रदर्शनको मनोबलले ओमानले अर्को महिना घरेलु मैदानमा हुने टी२० विश्वकप छनोटमा आशा झनै बढाएको छ । ओमान, पपुवा न्युगिनी र सामोआ समूह सी मा छन् । समूह ए मा मलेसिया, कतार र युएई छन् । समूह बी मा जापान, कुवेत र नेपाल छन् । हरेक समूहका शीर्ष दुई टोली सुपर सिक्समा प्रवेश गर्नेछन् । सुपर सिक्सका शीर्ष तीन टोली विश्वकपमा पुग्नेछन् ।

यो पनि : भारतलाई स्तब्ध पार्नबाट चुक्यो ओमान