सुमन अधिकारी, बुटवल

बुटवलमा प्रथम निशान न्यौपाने स्मृति सेभेन ए साइड फुटबल प्रतियोगिता सुरु भएको छ ।

गोर्खा ब्याइज स्पोर्टस क्लब आयोजना सुरु भएको प्रतियोगिताको उद्घाटन खेलमा झरना स्पोर्टिङ क्लब कुन्जलापुरले एन्फा एकेडेमी रातोलाई २-१ ले पराजित गरेको छ ।

एन्फा एकेडेमीको खेलमैदानमा भएको प्रतिस्पर्धात्मक खेलमा झरनाको जितमा अशोक घर्तीले ३४ र ४० औं मिनेटमा गोल गरेका हुन् ।

खेलको दोस्रो हाफको पहिलो मिनेटमा एन्फाका सन्दिप सेजुवालले गोल गरे । खेलमा झरनाका अशोक घर्ती प्लेयर अफ दी म्याचबाट पुरस्कृत भए ।

यसैगरि दोस्रो खेलमा जनज्योती युवा क्लबले न्यु पिएम सप्लायर्सलाई ३-० गोल अन्तरले पराजित गरेको छ । जनज्योतीको जितमा गगन रजाली, अस्मित शर्मा र विजय सुर्यबंशीले गोल गरे । खेलमा जनज्योतीको गोलकिपर सत्यम श्रेष्ठ प्लेयर अफ दी म्याचबाट पुरस्कृत भए ।

अखिल नेपाल फुटबल संघ (एन्फा) का उपाध्यक्ष दीर्घबहादुर केसी (कुमार) , रुपन्देही जिल्ला फुटबल संघका अध्यक्ष लोक पुन, स्वर्गिय न्यौपानेका बुबा रामप्रसाद न्यौपाने प्रतियोगिताको संयुक्त रुपमा उद्घाटन गरे ।

बुधवार पहिलो खेल गोर्खा ब्वाइज स्पोर्टस र डिफ एफ सि, न्यु होराइजन स्पार्टस क्लब र अमुवा एफ सि, लुम्बिनी सिटी कलेज र इटर स्पोर्टस क्लब तथा सौभाग्य युवा क्लब र भूपु सैनिक स्पोर्टिङकाबीच खेल हुने खेल संयोजक संदिप बउम्बुले जनाएका छन् ।

प्रतियोगिताको विजेता टोलीले उपाधि ६१ हजार र दोस्रो टोली ३५ हजार रुपैयाँ प्राप्त गर्ने क्लबका पूर्वअध्यक्ष दीर्घ बहादुर केसीले बताए । प्रतियोगितामा २० टोलीको सहभागिता छ।

बुटवल एन्फा एकेडेमीका कप्तान समेत रहेका निशान न्यौपानेको गत बर्ष सडक दुर्घटनामा मृत्यु भएको थियो ।