दुर्घटनामा क्रिकेटर मिनाशको निधन

विराटनगर (हाम्रो खेलकुद) – मोटरसाइकल दुर्घटनामा परेर कोशी प्रदेश क्रिकेट टोलीका कप्तान रहिसकेका २७ वर्षीय क्रिकेटर मिनाश थापाको निधन भएको छ ।

जिल्ला प्रहरी कार्यालय मोरङका अनुसार बुधबार राति विराटनगर–४ स्थित एयरपोर्ट लाइनमा दुर्घटना भएको हो । एयरपोर्टबाट गणेशचोकतर्फ जाँदै गर्दा थापा सवार प्रदेश नम्बर १–०२–०४२ प ८००२ नम्बरको मोटरसाइकल अनियन्त्रित भई दुर्घटना भएको प्रहरीले जनाएको छ ।

दुर्घटनामा गम्भीर घाइते भएका थापालाई उपचारका लागि कोशी अस्पताल पुर्‍याइए पनि चिकित्सकले मृत घोषणा गरेका थिए । जिल्ला प्रहरी कार्यालय मोरङका प्रवक्ता डिएसपी कोपिला चुडालका अनुसार घटनाबारे थप अनुसन्धान भइरहेको छ ।

थापाको निधनले नेपाली क्रिकेट क्षेत्रमा शोक छाएको छ । कोशी प्रदेश क्रिकेट संघले पनि थापाको निधनले क्रिकेटलाई क्षति पुगेको जनाएको छ । प्रदेश टोलीको कप्तानी समेत गरिसकेका विकेटकिपर ब्याटर घरेलु क्रिकेटमा परिचित नाम थिए ।