काठमाडौं (हाम्रो खेलकुद) – विभागीय टोली त्रिभुवन आर्मी क्लब राजभानीमा जारी पहिलो संस्करणको प्रधानमन्त्री कप एक दिवसीय पुरुष राष्ट्रिय क्रिकेट प्रतियोगिताको २०७४ अन्तर्गत समूह ‘बी’को विजेता बनेको छ। विजेता बन्ने क्रममा आर्मीले समूहको अन्तिम खेलमा अर्काे विभागीय टोली नेपाल पुलिस क्लबलाई सात विकेटले पराजित गरेको हो।
समूह चरणमा तीनै खेलमा जित हात पारेको आर्मीले ६ अंक जोड्यो। आर्मीसँग पराजित भएपनि पुलिस ४ अंक जोड्दै समूहको उपविजेता बन्दै सेमिफाइनलमा पुग्न सफल भयो। समूहको पुछारमा रहेका सुदूरपश्चिम र पूर्वान्चल १/१ अंक जोड्दै समूह चरणबाट बाहिरिए।
समूह विजेता आर्मीले सेमिफाइनलमा समूह ‘ए’को उपविजेतासँग भिड्नेछ भने उपविजेता पुलिसले समूह ‘ए’को विजेतासँग खेल्नेछ। समूह ‘ए’मा विभागीय टोली सशस्त्र प्रहरी बल (एपीएफ)सँगै मध्यमाञ्चल, मध्यपश्चिमाञ्चल र पश्चिमाञ्चल रहेका छन्।
समूह ‘ए’ को पहिलो खेल सोमबार नेपाल एपिएफ क्लब र पश्चिमाञ्चलबीच हुनेछ।
