काठमाडौँ (हाम्रो खेलकुद) – असार ५ गतेदेखि किर्तिपुरस्थित टि.यु. मैदानमा आयोजना हुने अन्तर्राष्ट्रिय प्रतियोगिता एसियन प्रिमियर लिगको अक्सन भोलि हुने भएको छ। ६ टोलीको सहभागिता रहेको एपीएलमा १ सय ८ खेलाडीको सहभागिता रहनेछ।
प्रति टोली १८ खेलाडी रहने र प्रत्यक टोलीमा २ अन्तर्राष्ट्रिय स्तरका खेलाडी रहने पनि जानकारी दिइयो। प्रत्यक टोलीले आफ्नो सुरुवाती एघारमा २ अन्डर १९ खेलाडी अनिवार्य राख्नुपर्ने नियम रहेको छ। सबै टोलीका कप्तानको नाम भने निर्णय भइसकेको छ।
इन्डियन स्टार्सका कप्तान तिलकरत्ने दिल्सान रहेका छन् भने नेपाल स्टर्मको कप्तानी स्वप्निल पटेलले गर्नेछन्। श्रीलंकन लायन्सको कप्तानमा फरभिज महारुफ र बंगलादेश टाइगर्सको कप्तानमा अल अमिन होसेन रहेका छन्। यसैगरी दुबई वारियार्सको अब्दुल शकुर र अफगानिस्तान बुल्सको राना नाभिद अल हुसेनले नेतृत्व सम्हाल्नेछन्।
प्रतियोगिताको अक्सनमा दक्षिण एसियाली राष्ट्रका खेलाडीहरुले सहभागिता लिन पाउनेछन्। खेलाडीहरुको नामावली भने अक्सनपछि मात्र टुंगो लाग्ने जानकारी आयोजक कमिटिले दिएको छ। नेपाली खेलाडीहरुको बारेमा भने आयोजक कमिटीले विस्तृत रुपमा नखुलाएपनि केहि नेपाली खेलाडी अक्सनमा रहने जानकारी दिइयो।
अक्सनमा रहेका खेलाडीहरुलाई ३ स्तरमा बाँडिएको र स्तर अनुसार न्युनतम रकम तोकिएको पनि कार्यक्रममा जानकारी दिइयो। ‘क’ वर्गको खेलाडीको न्युनतम मूल्य ३० हजार भारु रहेको छ भने ‘ख’ र ‘ग’ वर्गले क्रमश: न्युनतम रु २० हजार भारु र ३० हजार भारु पाउनेछनन्।
