सुबास हुमागाईं

काठमाडौँ – सोमबार उद्घाटन भएको एसियन क्लब प्रिमिएर लिग (एपिएल) टि२० क्रिकेट प्रतियोगितामा नेपालका ५ खेलाडी नेपाल स्टर्मबाट खेल्दै छन्। तीमध्ये परेश लोहनी आइकनिक खेलाडीका रुपमा टोलीमा अटाएका हुन् भने अन्य ४ खेलाडी लिलामीमा बिकेका थिए।

नेपालबाट सर्वाधिक १ लाख भारतीय रुपैयाँमा विक्री भएका भुपेन्द्र थापाले यस्तो किसिमको प्रतियोगिता नेपालमा पहिलो पटक हुन लागेकोले उत्साहित रहेको बताए। प्रतियोगितामा उनको सहभागिता बारेमा सोध्दा उनले आफैं दर्ता फारम भरेको जानकारी दिए। “म सन् २०१४ मा भारतको अहमदाबाद आइपिसिएल खेल्न गएको थिएँ। त्यहाँ मेरो प्रदर्शन राम्रो रहेको थियो। त्यसैकारण उतैका साथीहरुले मलाई एसियन क्लब प्रिमियर लिगको बारेमा जानकारी दिए। मैले मे महिनाको पहिलो हप्तामा फारम भरेर पठाएको थिएँ।”

उनले आफुले नेपालका अन्य खेलाडीहरुलाई पनि जानकारी दिएको र अहिले बिकेका ४ खेलाडीले पनि उनीमार्फतनै दर्ता प्रक्रिया चालेको बताए। “मैले यस प्रतियोगिता बारे नेपालका अन्तर्राष्ट्रिय खेलाडीलाई पनि भनेको थिएँ। तर लिलामीमा खेलाडी बिक्ने र दर्ता शुल्क पनि अमेरिकी डलर १ सय रहेकाले खेलाडीहरु हिच्किचाएको हुन सक्छ। नेपालमा पैसा खर्च गरेर खेल्ने बानी नरहँदा कम खेलाडीको सहभागिता रहेको हो ।”

उनले यस प्रतियोगितालाई एक अवसरको रुपमा लिएको बताए। “मलाई राष्ट्रिय टिममा पर्नको लागि यो प्रतियोगिता फाइदाजनक हुने विश्वास लिएको छु। मैले यस प्रतियोगिताको लागि दुई हप्ताको प्रशिक्षण गरेको छु। सायद मेरो प्रदर्शन पनि राम्रै रहन्छ होला।”

उनले यस प्रतियोगिताको बारेमा कहींबाट कुनै दवाव नआएको पनि खुलाए। उनले आफ्नो लिलामिको बारेमा भने पत्रपत्रिका पढेरै थाहा पाएको जानकारी दिए।