काठमाडौं (हाम्रो खेल्कुद) – एसिसी यू–१९ एसिया कप अन्तर्गतको पहिलो खेलमा बंगलादेशसँग २ विकेटको झिनो अन्तरले पराजित भएपछि नेपाली युवा टोलीका प्रशिक्षक विनोद दासले समग्रमा नेपालले राम्रो खेल खेलेको तर नतिजा आफ्नो पक्षमा नअाउँदा दुःख लागेको बताएका छन् ।

‘हाम्रो सुरुवात राम्रो भएन । ८० रनको स्कोरमा ४ विकेट गइसकेको थियो।’ उतारचढाव युक्त खेलबारे बताउँदै दासले भने, ‘हामीले फेरी पुनरागमन गर्यौँ र १८१ रन सम्मको लक्ष्यमा पुर्यायौँ ।’

दोस्रो पारीमा पनि खेल उस्तै रह्यो । पहिलो विकेटका लागि संघर्षरत नेपालले बंगलादेशले ४७ रन जोड्दा मात्रै पिंक घोषलाई एलबिडब्लुको सिकार बनाएको थियो । पुनः नेपाली बलरहरुले पुनरागमन गर्दै नेपाललाई खेलमा फर्काएका थिए ।

‘बंगलादेश टेस्ट खेल्ने राष्ट्र भएकाले उनीहरुसँग हाम्रो तुलनामा अनुभव बढी छ । राम्रो विकेटमा क्रिकेट खेल्दै आएकाले उनीहरुलाई ब्याट कुन दिशामा घुमाउँदा एकदुई रन जोड्न सकिन्छ भन्ने थाहा छ।’ दासले भने, ‘हामीले भर्खरै तीनचारवटा खेल मात्रै राम्रो विकेटमा खेल्न पायौँ । उनीहरुको जस्तै सुधार हाम्रो ब्याट्सम्यानमा पनि देखिँदै आएको छ।’

भोली हुने भारतसँगको खेलबारे प्रतिक्रिया दिँदै दासले भने, ‘टेस्ट राष्ट्रहरुसँग खेल्नु हाललाई आफूलाई ‘इम्प्रुभ’ गर्ने माध्यम हो । यदि हामीले टेस्ट खेल्ने राष्ट्रहरुसँग राम्रो गर्‍यौँ भने हामीलाई आफ्ना क्षेत्रको टोलीहरुसँग खेल्न आत्मविश्वास बढेर जान्छ।’

बंगलादेशसँगको अभ्यास खेल, आजको खेल र भोली हुने भारत विरुद्धको खेल नेपालका लागि आफ्नो क्षमता मापन गर्ने राम्रो माध्यम भएको पनि दासले बताए । बंगलादेश विरुद्ध खेल्दा ओपनर आसिफ सेख हल्का ज्वरोसँग जुध्नुपरेकाले ठूलो स्कोर गर्न नसकेको बताउँदै दासले अनिलकुमार साह र दीपेन्द्रसिंह ऐरीले सुरुवात पाए पनि त्यसलाई ठूलो स्कोरमा परिणत गर्न नसकेको उनले बताए।

‘मध्यक्रमका ब्याट्सम्यानहरु भिम सार्की र रोहित पौडेलको राम्रो प्रदर्शनले नेपालको ब्याटिङमा गहिराई देखिएको छ।’ दासले भने, ‘आगामी खेलमा अन्य टोलीसँग दुई सय तीस/चालिस रन बनाउन सके राम्रो च्यालेन्ज दिनसक्छौँ ।’

भारत विरुद्धको भोलीको खेलमा आफ्नो ‘बेस्ट’ दिने प्रयास गर्ने दासले बताए । ‘भारतलाई सप्राइज दिन सक्छौँ भन्ने आशा छ। यो सजिलो छैन तर हामीले मानसिक रुपमा आफ्नो बेस्ट गर्नेछौँ भनेर खेल्यौँ भने मलाई लाग्छ भोली हामी अझै राम्रो प्रदर्शन गर्नसक्छौ।’ दासले भने ।