काठमाडौं (हाम्रो खेलकुद)– दशक भन्दा लामो समयपछि काठमाडौंको मुलपानीको माथिल्लो क्रिकेट मैदान खेल्न हुने भएको छ , जहाँ आज प्रदर्शन खेल भएको छ । राष्ट्रिय खेलकुद परिषद्का सदस्य सचिव केशवकुमार विष्टले बहुप्रतिक्षित मुलपानी क्रिकेट मैदानको उद्घाटन गरे ।
तस्बिर : विवेक सुवेदी / हाम्रो खेलकुद
प्रदर्शनी खेलमा सदस्य सचिव ११ र भेट्रान ११ बीचको प्रदर्शनी खेल भएको थियो । खेल सदस्य सचिव ११ ले ८७ रनले जित्यो । खेलका म्यान अफ द म्याच रहेका राजु बस्न्यातले ५ विकेट लिएपछि १ सय ९७ रनको लक्ष्य पछ्याएको भेट्रान १ सय ९ रन अलआउट भएको थियो । सर्वाधिक ५२ रन जोडेका मन्जित श्रेष्ठ र राष्ट्रिय टोलीका पूर्वकप्तान पवन अग्रवाल ३३ रन बनाउनु बाहेक अन्य खेलाडीको ब्याट खासै चलेन ।
त्यसअघि ब्याटिङ गरेको सदस्य सचिव ११ का लागि ओपनर सुनिल धमलाले ४२ रन बनाए । बिनोद भण्डारीले १८ बलमा ३९ रन जोडे । अर्का ओपनर दीपेन्द्र चौधरीले ३० रन बनाए । भेट्रानका पवनले ३ ,परेश लोहनी र सन्दिप श्रेष्ठले समान २ विकेट लिए ।
