काठमाडौं (हाम्रो खेलकुद)– भारतविरुद्ध उमेर समूहमा एतिहासिक जितको श्रेय नेपाली युवा टोलीको मेहनत र उनीहरुको विश्वासलाई जाने प्रशिक्षक विनोद दासले बताएका छन् । मलेसियामा जारी एसीसी यू १९ एसिया कप क्रिकेटको पहिलो खेलमा बंगलादेशसँग दुई विकेटले पराजित भएको नेपालले दबाबका बीच तीन पटकको च्याम्पियन भारतलाई आज १९ रनले हराएको थियो । कुनै पनि उमेर समूहमा नेपालले भारतलाई हराएको यो पहिलो पटक हो ।
प्रशिक्षक दासले प्रतिद्वन्द्वि अनुसारको तयारी गरेको बताए । ‘हामीले टोली अनुसारको तयारी गरेका थियौं’ उनले भने,‘ आफ्नो उत्कृष्ट प्रदर्शन दिनुपर्ने भन्नेमा हामी तयार थियौं र प्रदर्शन पनि त्यहि अनुरुप नै भयो ।’ खेल निकै सुरुआतबाट प्रतिस्पर्धात्मक रहेको उल्लेख गर्दै प्रशिक्षकले भने,‘यहाँ यसअघि खेलेको आधारमा परिस्थिति समयसँगै बदलिने हामीलाई थाहा थियो ।’
उनले कप्तान दीपेन्द्र सिंह ऐरीको पनि खुलेर प्रशंसा गरे । ‘दीपेन्द्रले अहिले सम्मकै उत्कृष्ट प्रदर्शन गरेको देख्न पाइयो ’ उनले थपे,‘उनले ब्याटिङ र बलिङ दुवैमा नेतृत्व लिए ।’ दीपेन्द्रले ८८ रन बनाउनका साथै ४ विकेट पनि लिएका थिए । १ सय ८६ रनको लक्ष्य पछ्याएको भारतले ४६.१ ओभरमा सबै विकेट गुमाएर १ सय ६६ रन बनाएको थियो । नेपालले समूह चरणको अन्तिम खेल मंगलबार आयोजक मलेसियासँग खेल्नेछ ।
