काठमाडौं (हाम्रो खेलकुद) – मलेसियामा जारी एसीसी यु १९ युथ एसिया कप अन्तर्गत दोस्रो सेमिफाइनलमा अफगानिस्तानले टस जितेर पहिले बलिङ गर्न रोजेको छ । पहिलो सेमिफाइनलमा डर्क वर्थ लुइसको आधारमा पाकिस्तानले बंगलादेशलाई २ विकेटले हराएको थियो ।
एसीसी यू १९ एसिया कप क्रिकेटको यात्रामा नेपाली युवा टोली निस्कदा कतिलाई लागेको थियो, नेपाल समूह चरणबाटै बाहिरिन्छ । टेस्ट मान्यता प्राप्त भारत, बंगलादेशको समूहमा परेकोले त्यो अनुमान अस्वभाविक पनि थिएन ।
सुरुआत पनि त्यस्तै भयो, बंगलादेशसँग २ विकेटले नेपाली टोली पराजित भयो । त्यसपछिको प्रतिद्वन्द्वि थियो भारत । भारतलाई नेपाललाई हराउला भन्ने कसैलाई लागेको थिएन । त्यसको कारण थियो, नेपालले उमेर समूहमा त्यसअघि भारतलाई हराउन सकेको थिएन ।
भारत यसै पनि यू १९ एसिया कपको सबैभन्दा सफल टोली । तीन पटकको च्याम्पियन । तर, नेपालले असम्भवलाई सम्भव बनाएर भारतलाई १९ रनले हरायो । नेपालको त्यो भारतमाथिको जित एतिहासिक थियो, नै त्यहि जितले टोलीको सेमिफाइनलको ढोका पनि खोलेको थियो ।
तर, अन्तिम खेलमा मलेसियालाई ८ विकेटले हराउँदा पनि नेपाल अघि बढ्ने नबढ्ने अर्को खेलको नतिजामा भर पर्ने थियो । त्यहाँ अर्को नतिजा त्यस्तो आयो, जसले नेपालको सेमिफाइनल यात्रा सहज भयो । बंगलादेशले भारतलाई हराएपछि सोझै नेपाल अन्तिम चारमा पुग्यो भने भारत प्रतियोगिताबाट बाहिरयो ।
अब आज अर्को ठूलो परिक्षाबाट नेपाली टोली गुज्रनु पर्नेछ । नेपालले फाइनल प्रवेशका लागि आज अफगानिस्तानको सामना गर्दैछ । पछिल्लो समय क्रिकेटमा ठूलो फड्को मारेको अफगानिस्ता प्रतियोगिताको दाबेदारका रुपमा उभिएको छ । श्रीलंका, पाकिस्तान सम्मिलित समूहबाट विजेताका रुपमा अफगानिस्तान अघि बढेको थियो ।
आजको खेल जित्ने टोलीले पाकिस्तानसँग फाइनल खेल्नेछ । नेपाल र अफगानिस्तानको खेल नेपाली समय अनुसार बिहान ७ः१५ बजे सुरु हुनेछ ।
