काठमाडौं (हाम्रो खेलकुद) – मलेसियामा जारी एसीसी यु १९ एसिया कपमा नेपाल अफगानिस्तानसँग सेमिफाइनलमा ७ विकेटले पराजित हुँदै प्रतियोगिताबाट बाहिरिएको छ । विजेता अफगानिस्तान भने आइतबार हुने फाइनलमा पाकिस्तानको सामना गर्ने छ ।
प्रशिक्षक विनोद दास:
हामी आज योजना अनुसार चल्न सकेनौँ र अवस्था खराबबाट नाजुक हुन पुग्यो । अनिलबाहेक कसैले राम्रो ब्याटिङ गर्न सकेनन् । कम स्कोरको लक्ष्य भएको कारण हामीले बलिङतर्फ गर्न सक्ने खासै केहि थिएन ।
प्रतियोगिताको दु:खत अन्त्य भएकोमा म आफैं दु:खी छु । आज हामी हाम्रो स्तरमा खेल्न सकेनौँ । समग्रमा प्रतियोगिता हेर्ने हो भने थुप्रै सकारात्मक पक्षहरु चैँ छन् । पहिलो पटक सेमिफाइनल पुग्नु पनि ठूलो कुरा हो । हामीले भारतलाई हराएर बंगलादेशलाई पनि राम्रो प्रतिस्पर्धा दियौँ ।
प्रतियोगितामा हाम्रो प्रदर्शन राम्रो रहेकोले म सन्तुष्ट छु । आगामी दिनहरुमा हामी आफ्नो पक्षबाट जे सकिन्छ गर्ने छौँ । एउटा प्रशासनिक निकायको गठन भए पछि सो निकायको पनि भूमिकाहरु स्पष्ट हुने छ ।
