काठमाडौं (हाम्रो खेलकुद) – टिभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगितामा नवौं दिन आज पहिलो खेलमा चितवन टाइगर्सले भैरहवा ग्ल्याडियसर्टसलाई जितका लागि ८८ रनको लक्ष्य दिएको छ ।
कीर्तिपुरस्थित त्रिवि क्रिकेट मैदान टस हारेर पहिले ब्याटिङको निम्तो पाएको चितवन टाइगर्सले २० ओभरमा ९ विकेट गुमाएर ८७ रनको सामान्य योगफल तयार पारेको छ । जारी इपिएलमा कुनै पनि टोलीले बनाएको यो सबैभन्दा कम स्कोर हो । चितवनले यो योगफल रक्षा गर्न नसके प्रतियोगिताबाट बाहिरिने छ ।
४ खेलाडीले मात्र दोहोरो अंक बटुल्न सकेको चितवनका लागि कप्तान दिपेन्द्र सिंह एरी र योगेन्द्र सिंह कार्कीले सर्वधिक समान १५ रन बनाए । ललित सिंह भण्डारीले १३ रन जोडे भने ट्यालेन्ट हन्टबाट छनोट भएका आकाश थापा १० रन बनाए । प्रविण गुप्ता ८ रन र दिलिप नाथ ४ रनमा आउट भए ।
भैरहवाका लागि कप्तान शरद भेषवाकरले सर्वाधिक ३ विकेट लिए भने भुवन कार्की र हरिशंखर शाहले समान २ विकेट लिए । कृष्ण कार्की र पुनित मेहेराले समान १ विकेट लिए ।
