काठमाडौं (हाम्रो खेलकुद) – विराटनगर वारियर्सले राजधानीमा जारी टीभिएस एभरेस्ट प्रिमियर लिग (इपीएल) टी–ट्वान्टी क्रिकेट प्रतियोगिताको पहिलो क्वालिफायरमा जितका लागि १ सय २८ रनको लक्ष्य पाएको छ । त्रिवि क्रिकेट मैदानमा टस हारेर पहिले ब्याटिङ गरेको भैरहवाले निर्धारित २० ओभरमा ८ विकेट गुमाएर १ सय २७ रनको मध्यम स्कोर खडा गरेको हो ।

भैरहवाका लागि मध्यक्रमका ब्याट्सम्यान पुनित मेहरा ४९ रनमा आउट भए । आरिफ शेखले ४६ रन बनाए । आरिफ र पुनितले पाँचौ विकेटका लागि ८२ रनको साझेदारी गर्दै इनिङ्स उकासेका थिए । ३५ बल खेलेका आरिफले १ चौका र ३ छक्का प्रहार गरे । ३४ बल खेलेका पुनितले ३ चौका र ३ छक्का प्रहार गरे ।

खराव शुरुवात गरेको भैरहवाले शुरुवाती २७ रन जोड्दा महत्वपूर्ण ४ विकेट गुमाएको थियो । भुपेन्द्र थापा २, रोहित कुमार पौडेल ६ रनमा आउट आउट भए । कप्तान शरद भेषवाकार ८ रनमा आउट भए । ओभरसिज खेलाडी राहुल यादव ७ रनमा आउट भए । प्रथम सालुङ्के ३ रनमा आउट भए । विराटनगरका शाहन आदेशा आपुहामी र करन केसीले समान २ विकेट लिए । कप्तान पारस खड्का, वसन्त रेग्मी र अविनास कर्णले समान १ विकेट लिए ।

विराटनगर समूहको शीर्षस्थानमा तथा भैरहवा दोस्रो स्थानमा रहँदै क्वालिफायरमा पुग्न सफल भएको थियो । आजको खेल जित्ने टोली फाइनलमा प्रवेश गर्नेछ । पराजित हुने टोलीले आजै हुने इलिमेटरको विजेतासँग अर्को इलिमेटर खेल खेल्ने मौका पाउनेछ । इलिमेटरमा आज ललितपुर प्याट्रियट्स र पोखरा राइनोजबीच खेल हुदैछ ।