काठमाडौँ (हाम्रो खेलकुद)- ललितपुर प्याट्रियट्सले टीभिएस एभरेस्ट प्रिमियर लिग (इपीएल) टी–ट्वान्टी क्रिकेट प्रतियोगिताको दोस्रो क्वालिफायर खेलमा भैरहवा ग्ल्याडीयटर्सलाई जितको लागि १ सय ३३ रनको विजयी लक्ष्य दिएको छ ।
टस हारेर पहिले ब्याटिङको निम्तो पाएको ललितपुरले निर्धारित २० ओभरमा ६ विकेट गुमाएर १ सय ३२ रनको सामान्य योगफल बनायो । भैरहवाले केहीबेरमा जवाफी ब्याटिङ थाल्नेछ । यि दुई टिमबीचको विजेताले शनिबार हुने फाइनलमा बिराटनगर वारियर्ससँग प्रतिस्पर्धा गर्नेछ । ललितपुरका लागि जयकिसन कोल्सावालाले सर्वाधिक ४२ रनको योगदान दिए । अर्का ओपनर शंखर राना १२ रनमा रन आउट भए ।
कोल्सावाला र शंकर रानाले पहिलो विकेटको लागि ५१ रनको साझेदारी गरे । राम्रो शुरुवात गरेको ललितपुरले ६० रनमा महत्वपूर्ण २ विकेट गुमाउन पुग्यो । ललितपुरका कप्तान ज्ञानेन्द्र मल्ल २०, सन्नी पटेल २४ र कुशल भुर्तेल शुन्य रनमै आउट भए । कप्तान मल्ल आरिफ शेखको बलमा क्याच आउट भए । सोनु तामांङ १० रनमा नटआउट रहे भने अन्तिम बलमा आउट भएका दिपेश भण्डारीले ९ बलमा २२ रन प्रहार गरेका थिए।
भैरहवाका पुनित मेहेराले ४ ओभरमा २८ रन खर्चदै २ विकेट लिन सफल भए । हरिशंखर शाह, आरिफ शेख र भुवन कार्कीले समान १-१ विकेट लिए । राउण्ड रोविन लिगको आधारमा गत पुस ३ गतेबाट शुरु भएको प्रतियोगितामा विभिन्न ६ शहरका ६ टिमले प्रतिस्पर्धा गरेका थिए । प्रतियोगिताको विजेताले २१ लख रुपैया प्राप्त गर्नेछ ।
