काठमाडौं (हाम्रो खेलकुद) –मदन भण्डारी स्पोर्टस् एकेडेमीले नवौं स्थापना दिवसको अवसर पारेर आजबाट क्रिकेट एकेडेमी सञ्चालनमा ल्याएको छ । पूर्व सभामुख एवंम् नेकपा एमालेका नेता सुवास नेम्वाङले शान्तिगरमा एकेडेमीको उद्घाटन गरेका थिए ।

सोही अवसरमा स्पोर्टस एकेडेमीले हालै राजधानीमा भएको अन्तर्राष्ट्रिय ह्रवीलचियर त्रिकोणात्मक क्रिकेट प्रतियोगिताको विजेता नेपाली टोलीलाई ५० हजार रुपैयाँ सहित सम्मान गरेको थियो । त्यस्तै एकेडेमीले आजै गणेश दुलालको अध्यक्षतामा मार्सल आर्टस कमिटि गठन गरेकोे छ ।

कमिटीका सदस्यहरुलाइ बधाई तथा सफल कार्यकालको शुभकामना पनि दिइएको छ। एकेडेमीका खेलाडीको उपचारमा ५० प्रतिशत छुट दिने गरि हेल्पिङ ह्यान्ड अस्पतालसँग सम्झौता गरेको छ । नेता नेम्वाङले खेलाडीले राज्यबाट उचित सहयोग पाउन नसकेको उल्लेख गर्दै उचित व्यवस्थापन विना अन्तर्राष्ट्रिय स्तरमा नेपाली खेलाडीले प्राप्त गरेको सफलताको प्रसंशा गरे ।

खेल क्षेत्रमा जस्तै राजनीतिक दलका नेता पनि अनुशासनमा बस्नुपर्ने जोड दिदै नेम्वाङले एकेडेमी संचालनमा आए पछि खेल क्षेत्रमा अझै उपलब्धि प्राप्त गर्नेमा आफु विश्वस्त रहेको बताए । राष्ट्रिय क्रिकेट टोलीका प्रमुख प्रशिक्षक जगत टमाटाले नेपाली क्रिकेटको खस्कदो अबस्था प्रति सबैले सोच्नुपर्ने बेला आएको भन्दै एकेडेमी स्थापनाले क्रिकेटमा एउटा इट्टा थप्ने काम गरेको बताए ।