काठमाडौं (हाम्रो खेलकुद) – नेपाली राष्ट्रिय टोलीका लेग स्पिनर सन्दीप लामिछाने पकिस्तान सुपर लिग (पिएसएल) खेलेर आज स्वदेश फर्किएका छन् । सन्दीप दिउँसो साढे चार बजे अन्तर्राष्ट्रिय त्रिभुवन विमानस्थल आईपुगेका थिए ।
सन्दीपले खेलमा केहि त्रुटि रहेपनि समग्रमा भने प्रतियोगिता राम्रो रहेको बताए । सन्दीपले आफ्नो त्रुटी सुधार गर्दै अघि बढ्ने जनाए । त्यस्तै सन्दीपले विदेशमा खेल्दा नेपालको धेरै मिस हुने बताए । सन्दीपले तीन चार दिन घर परिवार र साथीभाईसँग समय बिताएपछि इन्डियन प्रिमियर लिग (आईपीएल ) खेल्न दिल्ली जाने बताए ।
‘केहि खेलमा मैले गल्ति गरेको थिएँ । तर अब त्यसमा अड्किने भन्दापनि त्यसलाई सुधार गरेर अगाडी बढ्न जरुरि छ । केहि दिनपछि नै आइपिएल खेल्न दिल्ली जाँदैछु,’ उनले भने । सन्दीप दिल्ली क्यापिटल्सबाट आईपीएल खेल्दै छन् । सन्दीपले पीएसएलमा लाहोर कलन्दर्सबाट खेलेको थिए । ७ खेल खेलेको सन्दीपले ११ विकेट हात पारेका थिए । तर, उनको टोलीले समूह चरणमा पुछारमा रहेर घर फर्कन बाध्य बन्यो ।
सम्रगमा यस्तो रह्यो सन्दीपको प्रर्दशन
बिग ब्यासको कारण सुरुवाती तीन खेल गुमाएका सन्दीपले ७ खेल मध्य ५ मा विकेट लिँदा २ खेलमा विकेटविहिन बने । एक खेलमा सन्दीप म्यान अफ द म्याच नै चुनिए । मुल्तान सुल्तानसँग डेब्यू गर्दै ४ ओभरमा ४६ रन खर्चेर ३ विकेट लिँदै मिश्रित सुरुवात गरेका सन्दीपले जेम्स भिन्स, पाकिस्तानका पुर्व कप्तान सोएव मालिक र आन्द्रे रसेललाई आफ्नो डेब्यू शिकार बनाए ।
दोस्रो खेलमा क्वेटा ग्ल्याडीयटर्सविरुद्ध कसिलो बलिङ गर्दै ४ ओभरमा २० रन खर्चेर १ विकेट लिए । अहसन अलीलाई आउट गरे । तेस्रो खेलमा पुन ग्ल्याडीयटसविरुद्ध खेल्दै सन्दीपले म्यान अफ द म्याच चुनिदै अविश्वसिनिय बलिङ गरे । सन्दीपले ४ ओभरमा १० रन खर्चेर ४ विकेट लिए । शेन वाटसन, राइली रुसो, उमर अकमल र दाजिज अनिस सन्दीपको गुग्लीमा फस्दै पेभिलिएन फर्के ।
चौथो खेलमा कराँची किंग्ससँग उत्कृष्ट प्रर्दशन गर्दै ४ ओभरमा १७ रन खर्चेर २ विकेट लिए । सन्दीपले बाबर आजम र कोलिन मुनरोलाई आउट गरे । पाँचौ खेलमा भने पेशवार जाल्मीसँग २.१ ओभर बलिङ गर्दै २२ रन खर्चिदा विकेट विहिन बने । आफ्नो व्यक्तिगत छैटौं खेलको लागि सन्दीप युएईबाट पिएसएलको लागि पाकिस्तान पुगे तर प्रर्दशन खराव रह्यो । ईस्लामबाद युनाइटेडसँग ४ ओभरमा ४६ रन खर्चिदा १ लिए । फिलिप साल्टलाई आउट गरे । अन्तिम खेलमा सन्दीपले मुल्तान सुल्तानसँग २.३ अोभर बलिङ गर्दै २८ रन खर्चिदा कुनै विकेट लिन सकेनन् ।
