एजेन्सी – इन्डियन प्रिमियर लिग (आइपिएल) को दोस्रो क्वालिफायर खेलमा आज साँझ दिल्ली क्यापिटल्स र चेन्नई सुपर किंग्स भिड्दै छन् । खेल नेपाली समय अनुसार साँझ ७ः४५ बजेपछि विशाखापट्नममा सुरु हुने छ । विजेता टोली फाइनलमा प्रवेश गर्नेछ ।

पहिलो क्वालिफायरमा चेन्नईलाई हराउँदै मुम्बई इन्डियन्स फाइनलमा पुगि सकेको छ । फाइनल आईतबार हैदरावादको राजिव गान्धी इन्टरनेशनल क्रिकेट स्टेडियममा हुने छ । लिग चरणका दुवै खेलमा दिल्ली चेन्नईसँग पराजित भएको थियो ।

दिल्ली आजको खेलमा विजयी भए पहिलो पटक आइपिएलको फाइनलमा पुग्ने छ । यो पटक दिल्लीलाई उपाधि दावेदारको रुपमा समेत हेरिएको छ । यी तीन कारण चेन्नईलाई हराउँदै दिल्ली पहिलो पटक आईपीएलको फाईनलमा पुग्न सक्छ ।

३. चेन्नईको कमजोर तीव्र गतिको बलिङ

चेन्नईले लिग चरणका अधिकाम्स खेलमा बलिङ मुख्य हतियार बनाउँदै जितेको छ । सर्वाधिक बलियो हतियार स्पिनर मानिएको छ । इमरान ताहिरले १५ खेलमा २३ विकेट लिदै सर्वाधिक विकेट लिने खेलाडीको सुचिमा दोस्रो स्थानमा छन् । हरभजन सिंहले १४, रविन्द्र जडेजा १३ विकेट लिदै आफ्नो दवदवाह कायम गरेका राखेका छन् । तर चेन्नईको तीव्र गतिका बलरमा दीपक चाहर बाहेक अन्यको प्रर्दशन जारी आईपीएलमा राम्रो छैन ।

सार्दुल ठाकुरले ८ खेलमा ६ विकेट मात्र लिएका छन् । मध्य गतिका दिपक चाहरले १५ खेलमा १७ विकेट लिएका छन् । मोहित शर्माले १ र स्कर्ट कुग्गेलेइजनले २ विकेट लिए । यी चारनै चेन्नईका प्रमुख तीब्र गतिका बलर हुन् । चाहर बाहेक अन्य कुनै तीब्र गतिका बलर लयमा देखिदैनन् ।

आज हुने क्वालिफायर खेल विशाखापटनाम मैदान स्पिनर भन्दा तीब्र गतिका बलर उपयोगि मानिन्छ । यहि मैदानमै बुधबार दिल्ली क्यापिटल्स र सनराइजर्स हैदरावादबीच एलिमिनेटरमा दुबै टोलीले चार-चार तीब्र गतिका बलर मैदान उतारेका थिए । यो अवस्थामा स्पिनरमा निर्भर रहेको चेन्नईको कमजोरी दिल्लीका ब्याट्सम्यानले उठाउन सक्छन् ।

२. आक्रमक शैलीको कमी

चेन्नईका कप्तान महेन्द्र सिंह धोनी बाहेक अन्य खेलाडीले यस सिजनको आईपीएलमा आक्रमक शैलीमा ब्याटिङ गर्न सकिरहेका छैनन् । शेन वाटसनको लय त्यति राम्रो छैन । आम्बाती रायडू, सुरेश रैना, मुरली विजय, फाफ डु प्लेसिस चेन्नईका शीर्ष क्रममा ब्याट्सम्यान हुन् । तल्लो क्रममा धोनीलाई छाड्ने हो भने केदार जाधव,रविन्द्र जडेजा र ड्वेन ब्राभोमा निर्भर छ ।

धोनी बाहेक चेन्नईका कुनै पनि ब्याट्सम्यानको स्ट्राईक रेट १ सय ३० भन्दा माथि छैन । यस अर्थमा चेन्नईका ब्याट्सम्यानमा चौका छक्का भन्दा पनि डबल सिंगल रन बढि बटुलेको देखिन्छ । धोनी नचलेको खण्डमा चेन्नईले विशाल योगफल बनाउन र पछ्याउन पनि मुश्किल पर्ने देखिन्छ । जुन घातक सावित हुन सक्छ ।

१.पन्त र ऐरको लय

दिल्ली क्यापिटल्सलाई ७ वर्षपछि प्ले अफमा पुर्याउन कप्तान श्रेयस ऐर र ऋषभ पन्तको प्रर्दशन उत्कृष्ट छ । दिल्लीका लागि यी दुई खेलाडी सर्वाधिक रन बनाउनेमा शीर्ष स्थानमा छन् । पन्त र ऐरले समान १५ खेलमा ४ सय ५० रन बटुलेका छन् । यी दुईको उत्कृष्ट लयमा दिल्लीले आज विशाल रन बनाउन र पछ्याउन सक्छ ।

त्यस्तै ओपनर शिखर धवनले औसतामा उत्कृष्ट रन जोड्दै समान खेलमा ५ सय ३ रन बटुल्दै सर्वाधिक रन बनाउने खेलाडीको सुचिमा चौथो स्थानमा छन् । त्यस्तै पृथ्वी शाले पनि लगातार रन जोडीरहेका छन् । दिल्लीका शीर्षक्रमका ब्याट्सम्यान लयमा हुँदा चेन्नईलाई हराउँदै दिल्ली पहिलो पटक आईपीएलको फाईनलमा पुग्न सक्ने देखिन्छ ।