एजेन्सी – अष्ट्रेलियन कप्तान आरोन फिन्चले एकदिवसिय विश्वकप क्रिकेट प्रतियोगितामा इंग्ल्यान्डविरुद्ध शतक पुरा गरेका छन् ।
लर्डसमा टस हारेर पहिला ब्याटिङ थालेको अष्ट्रेलियाका लागि कप्तान तथा ओपनर आरोन फिन्चले १ सय १५ बलमा आफ्नो वान डे करियरको १५ औं शतक पुरा गरेका हुन् । फिन्चले जोफ्रा आर्चरको ३६ ओभरको दोस्रो बलमा २ रन बटुल्दै ११ चौका र २ छक्काको सहयोगमा शतक पुरा गरेका थिए । लगत्तै अर्को बलमा भने ठूलो शट खेल्ने धुनमा फिन्च क्रिस वोक्सबाट क्याच आउट हुँदै १ सय रनमा पेभिलिएन फर्किएका छन् ।
जारी विश्वकपमा फिन्चको यो दोस्रो शतक हो । फिन्चले यस अघि श्रीलंकासँगको खेलमा पनि उत्कृष्ट शतक प्रहार गरेका थिए । ओपनर डेविड वार्नर र आरोन फिन्चले २२.४ ओभरमा १ सय २३ रनको शतकीय साझेदारी गर्दै उत्कृष्ट सुरुवात दिलाएका थिए । यी दुईबीचको साझेदारी मोइन अलीले जो रुटबाट वार्नरलाई ५३ रनमा क्याच आउट गराउँदै तोडे । वार्नरले ६१ बलमा ६ चौका प्रहार गरे ।
बेन स्टोक्सले ३३ ओभरको दोस्रो बलमा उस्मान खवाजालाई २३ रनमा बोल्ड आउट गरे । अष्ट्रेलिया ३६ ओभरमा १ सय ९० रन बनाउन ३ विकेट गुमाएको छ ।
