भूपेन्द्र जिसी, काठमाडौं

नेपाल यू-१९ टोलीका लेग स्पिनर तिलक भण्डारी काठमाडौं आएको दुई वर्ष पुग्दैछ । सानो उमेरदेखि नै क्रिकेटप्रति लगाव भएका तिलक क्रिकेट सिक्न भनेर नै बुटवलबाट काठमाडौं आएका हुन् । जापानमा रहेका बुबा पदमराज भण्डारीले क्रिकेट सिक्ने इच्छा भए डेरा लिएरै भएपनि काठमाडौं जान भनेपछि तिलक राजधानी पसे । केहि महिनाअघि यू-१६ राष्ट्रिय टोलीमा परेका तिलक गत साता यू-१९ राष्ट्रिय टोलीको अन्तिम १४ मा पर्न सफल भए ।

नेपाली यू१९ राष्ट्रिय क्रिकेट टोलीले पछिल्लो एक वर्ष लेग स्पिनर बिनानै अन्तर्राष्ट्रिय प्रतियोगिता खेल्यो । सन्दीप लामिछानेले यू-१९ टोलीबाट नखेल्ने निर्णय लिएपछि टोलीमा लेगस्पिनरको खोजि सुरु भयो । यसबीचमा प्रशिक्षक विनोद दासले थुप्रै प्रतिभाको प्रर्दशन र क्षमता हेरिरहे । तर, दासले आफुले चाहेको जस्तो प्रतिभा भेट्टाउन सकेनन् ।

गत मंगलबार मलेसियामा हुने एसीसी इस्टर्न रिजन यू१९ प्रतियोगिताको लागि नेपालले १४ सदस्य टोली घोषणा गर्यो । टोलीमा पहिलो पटक तीन नयाँ अनुहारलाई मौका दिइयो । लेग स्पिनर तिलक भण्डारी पनि ती नयाँ अनुहार मध्यका एक हुन् ।

एक महिना अघि थाइल्यान्डमा सम्पन्न एसीसी यू१६ इस्टर्न रिजन प्रतियोगिताको उपाधि नेपाललाई जिताउन लेग स्पिनर तिलक भण्डारीको प्रर्दशन महत्त्वपूर्ण थियो । एसीसी इस्टर्न रिजनमा तिलकले ५ खेलमा मात्र ३ विकेट हात पारे । तर यसक्रममा उनले प्रति ओभर २.२७ रनको दरमा आफ्नो इकोनोमी राखे । त्यहि प्रर्दशनबाट प्रभावित हुँदै प्रशिक्षक विनोद दासले उनलाई जेठ अन्तिमबाट सुरु भएको यू१९ टोलीको बन्द प्रशिक्षणमा बोलाएका थिए ।

बन्द प्रशिक्षणपछि दासले यू१९ तथा घरेलु फ्रेन्चाइज लिग खेलिसकेका बायाँ हाते स्पिनर सुर्य तामाङलाई टोली बाहिर राख्दै तिलकलाई मौका दिए । लेग स्पिनर टोलीको मुख्य आवश्यकता पनि थियो । दासका अनुसार तिलकलाई आगामी  वर्षलाई समेत मध्यनजर गर्दै यू१९ टोलीमा मौका दिईएको हो ।

तिलकले गत चैत्रमा काठमाडौंमा भएको यू१६ क्रिकेट लिगमा प्रदेश ३ लाई उपाधि दिलाउँदा महत्त्वपूर्ण भूमिका निर्वाह गरेका थिए । त्यहि उत्कृष्ट प्रर्दशनसँगै उनले यू१६ इस्टर्न रिजनको लागि बन्द प्रशिक्षण हुँदै अन्तिम १४ सदस्य टोलीमा स्थान पक्का गरे । त्यस्तै तिलकले वैशाखमा भएको मनमोहन मेमोरियल अन्तर प्रदेश यू१६ राष्ट्रिय क्रिकेट प्रतियोगितामा पनि प्रदेश ३ बाट प्रतिनिधित्व गर्दै उत्कृष्ट लय कायम राखे ।

गुल्मीको सोतामा जन्मिएका तिलक बुबा पदमराज र आमा अम्बिका भण्डारीको कान्छो सन्तान हुन् । पछि उनको परिवार बुटवल बसाईं सर्यो । सानै उमेरदेखि विद्यालयमा टेनिस बलले क्रिकेट खेल्ने तिलक बेला बेलामा साथीहरुसँग बाहिर क्रिकेट खेल्न जान्थे । उनले धेरै समय टेनिस बलले नै क्रिकेट खेले । बिरलै मात्र ड्युज बलले अभ्यास गर्ने अवसर मिल्थ्यो ।

‘बुबा नेपालमा रहँदा क्रिकेटमा सामान्य रुपमा खेल्ने गर्थे । बुबाले पनि क्रिकेट खासै ध्यान नदिएकाले प्रशिक्षण गर्ने सोच नै आएन । नेपालले लगातार सफलता हात पार्दै गयो । मेरो पनि क्रिकेटप्रति लगाव बढ्दै गयो,’ तिलकले थपे, ‘बुबालाई क्रिकेट सिक्ने भनेपछि डेरा लिएर भएपनि काठमाडौं नै गएर राम्रोसँग क्रिकेट सिक्न भन्नुभयो । यहाँ केसीटीसीमा दुई वर्षदेखि लगातार प्रशिक्षण गरें । यू-१६ छनोटमा राम्रो प्रदर्शन गरेपछि यहाँसम्म आइपुगेको छु ।’ उनको बुबा पदमराज जापान पुगेको ६ वर्ष भएको छ ।

साधारण क्रिकेट खेल्ने तिलक आफ्नो क्रिकेट यात्रालाई अझ उचाई दिनको लागि बुबाको निर्देशन अनुसार काठमाडौं पसे । विगत दुई वर्षदेखि उनी नेपाली राष्ट्रिय क्रिकेट टिमका उप कप्तान ज्ञानेन्द्र मल्लले सञ्चालन गरेको काठमाडौं क्रिकेट टेनिङ सेन्टरमा प्रशिक्षणरत छन् । उनलाई क्रिकेट खेल्न घर परिवारबाट पनि त्यतिनै साथ छ । खेलप्रति मिहिनेत र लगावले नै उनले यू-१६ उमेर समूह हुँदै छोटो समयमा नै यू-१९ टोलीमा स्थान बनाउन सफल भएका छन् ।

अष्ट्रेलियाका महान लेग स्पिनर शेन वार्नबाट प्रभावित तिलक सानै उमेरदेखि लेग स्पिन बलिङ गर्न थालेको बताउँछन् । पछिल्लो समय नेपाली लेग स्पिनर सन्दीप लामिछानेबाट उनी धेरै प्रभावित बनेका छन् । सन्दीपलाई निरन्तर पछ्याइरहेको बताउछन् । हाल तिलक नाइटिङगल कलेजमा कक्षा ११ मा अध्ययनरत छन् ।

यू-१९ टोलीमा परेका तिलक आफ्नो लागि ठूलो अवसर अगाडी रहेको बताउँछन् । ‘ विनोद सरले भनेपछि यू१९ टोलीमा परेको थाहा पाएँ । धेरै खुसी भएँ र उत्तिकै नर्भस पनि । यो मेरा लागि सबैभन्दा ठूलो अवसर हो । यसको भरपुर सदुपयोग गर्न सक्दो मिहिनेत गर्नेछु,’ उनले भने ।

उमेर समूहको क्रिकेटमा बामे सर्दै गरेका तिलकले यस अवसरबाट घरेलु क्रिकेटको बाटो कोर्ने लक्ष्य राखेका छन् । ‘ उमेर समूहको यू-१९ मा अवसर पाएको छु । यहाँ राम्रो प्रदर्शन गर्न सके घरेलु क्रिकेट खेल्ने अवसर पाइन्छ । सिनियर टोलीबाट खेल्नु मेरो सपना हो । त्यसका लागि घरेलु क्रिकेटमा प्रदर्शन गर्न जरुरि छ । यसका लागि आफ्नो सक्दो प्रयास गर्नेछु,’ तिलकले थपे ।

तिलकसँगै नेपाल यू-१९ राष्ट्रिय क्तिकेट टोली आइतबार मलेसिया प्रस्थान गर्दैछ । नेपालले जुलाई २ देखि १० सम्म चल्ने एसीसी यु-१९ इस्टर्न रिजन प्रतियोगितामा प्रतिस्पर्धा गर्नेछ । उपाधि दावेदार मानिएको नेपालले समुह ‘ए’ मा सिंगापुर, म्यानमार र चीनसँग समुह चरणमा प्रतिस्पर्धा गर्नेछ । त्यस्तै समुह ‘बी’ मा हङकङ, थाईल्यान्ड, भुटान र आयोजक मलेसिया छन् ।

नेपालले पहिलो खेल जुलाई २ मा म्यानमारसँग खेल्ने छ । त्यस्तै ५ जुलाईमा सिंगापुर, ६ जुलाईमा चीनसँग प्रतिस्पर्धा गर्ने छ । दुवै समूहका शीर्ष दुई टोलीले जुन ८ मा हुने सेमिफाइनलमा प्रतिस्पर्धा गर्नेछन् । फाइनलमा ९ जुलाईमा हुने छ । यस प्रतियोगिताको विजेतासँगै भारत, पाकिस्तान, बंगलादेश, अफगानिस्तान, यूएई र कुवेतले एसिया कपमा प्रतिस्पर्धा गर्ने छन् । यू-१९ एसिया कप २८ अगस्ट देखी ८ सेप्टेम्बरसम्म श्रीलंकामा हुनेछ ।