भूपेन्द्र जिसी, काठमाडौं

मलेसियामा हुने एसीसी यू-१९ इस्टर्न रिजन प्रतियोगिताको लागि नेपाली यू-१९ क्रिकेट टोलीको अन्तिम टोली छनोट हुँदा एक खबरले सारा क्रिकेट जगतलाई तरंगित बनायो । यू-१९ टोलीको कप्तानी गर्दै सिनियर टोलीबाट समेत खेलिसकेका आसिफ शेख टोलीमा परेनन् । यसअघि लगातार टोलीको विकेटकिपर रहँदै आएका आसिफको स्थान नेपाली क्रिकेटका नयाँ अनुहार खडक बोहराले लिएका थिए ।

विकेटकीपर तथा ओपनर ब्याट्सम्यान खडक एक महिनाअघि काठमाडौंमा सम्पन्न प्रधानमन्त्री राष्ट्रिय एक दिवसिय क्रिकेट प्रतियोगितामा उदीयमान खेलाडी घोषित भए । पीएम कपमा सुदूरपश्चिम प्रदेशबाट खेलेका उनले एपीएफविरुद्ध डेब्यू गर्दै १९ रन जोडे । प्रदेश ५ विरुद्ध ६२ र प्रदेश तीन विरुद्ध ४० रन जोड्दै ठूलो संभावना देखाए । पीएम कपमा राम्रो छाप छोडेपछि यू-१९ टोलीका प्रशिक्षक विनोद दासले यू१९ बन्द प्रशिक्षण टोलीमा उनलाई समेटे ।

यसै साताबाट इस्टर्न रिजन प्रतियोगिताको लागि नेपालले तीन नयाँ अनुहार सहित गत मंगलबार १४ सदस्य टोली घोषणा गर्दा खडक टोलीमा पर्न सफल रहे । प्रशिक्षक दासको भनाइ मान्ने हो भने खडकको खेल्ने क्षमता र उमेरका कारण नै उनी आसिफको स्थानमा टोलीमा पर्न सफल भएका हुन् । आसिफले नियमित उमेर समूहको क्रिकेट खेलेको र अहिले क्षमतावान खेलाडी आएपछि भविष्यलाई मध्यनजर गर्दै खडकले मौका पाएको विनोदले बताए ।

बुबा हिक्मत बहादुर बोहरा र आमा जानकी बोहराका पहिलो सन्तान हुन् खडक । बैतडीको देहीमाडौंमा विंस.२०५९ सालमा जन्मिएका खडकका एक बहिनी र भाई छन् । सानै उमेरदेखी क्रिकेटमा अत्याधिक रुचि राख्ने र खेल्ने गर्दथे । उनले क्रिकेटबाहेक अन्य केहि कहिले पनि सोचेनन् । बैतडीमा सानै उमेर देखी क्रिकेट खेल्ने उनले दाईहरुसँग सिक्ने गर्दथे । एसएलसी दिँदासम्म गाउँघरमा नै सामान्य क्रिकेट खेलेका उनलाई माथिल्लो स्तरमा क्रिकेट खेल्नु थियो । उनको क्रिकेट रुचिलाई देखेर बुबा हिक्मत र अंकल वीरसिंह बोहोराले पनि राम्रो साथ दिए ।

बुबा र अंकलको सल्लाहमा नै सामान्य रुपमा क्रिकेट खेली रहेका उनि आफ्नो क्रिकेटलाई उचाई दिन एसएलसी दिएपछि तीन वर्षअघि उनि काठमाडौं छिरे । दुई वर्षदेखि खडक काठमाडौंमा रहेको हिमालयन क्रिकेट टेनिङ सेन्टरमा प्रशिक्षरणत छन् । उनलाई यहाँसम्म ल्याउन अंकल बिरसिंहको ठूलो साथ रहेको छ । आफ्नो हरेक सफलताको पछाडीको अंकलकोनै हात रहेको बताउछन् । बैतडीमा उनको अंकलको पसल छ । बुबाले भने भारतमा ड्राइभिङ गर्नुहुन्छ । उनको सबै खर्च बुवा र अंकलले हेर्दै आएका छन् ।

‘बैतडीको त्यो दुर्गम ठाउँबाट यहाँसम्म आउन थुप्रै चुनौती र समस्याको सामना गर्नुपर्यो । त्यहाँ एउटा राम्रो क्रिकेट एकेडेमी छैन । मध्यमवर्गिय परिवारमा जन्मिएपछि क्रिकेटमा लाग्न समस्या नै समस्या छ,’ खडकले गम्भिर हुँदै भने, ‘ सानैदेखि लगाव रहेकाले परिवारको साथ पाएँ । सायद वहाँहरुको हौसला नभएको भए यहाँसम्मको यात्रा सपनामा मै सिमित हुने थियो । ‘

खडकले प्रधानमन्त्री कप खेल्नुअघि नेपालगञ्जमा सम्पन्न आठौं राष्ट्रिय क्रिकेट प्रतियोगिता र २०७४ सालमा मनमोहन मेमोरियल यू१६ क्रिकेट प्रतियोगिता पनि खेलिसकेका छन् । उनी पहिलो पटक अन्तर्राष्ट्रिय प्रतियोगिता खेल्न लागेका हुन् ।

पछिल्लो तीन वर्षदेखि खडक क्रिकेट सिक्नकै लागि उनि काठमाडौंमा कोठा लिएर बसेका छन् । क्रिकेटसँगै पढाईपनि अघि बढाईरहेका उनी हाल जन सेवा उच्च माध्यमिक कीर्तिपुरबाट कक्षा १२ परिक्षा दिएर बसेका छन् । क्रिकेटमा नै आफ्नो अधिकांश समय समर्पण गरेका खडकसँग यसअघि यू-१६ टोलीमा नपर्नुको दुखेसो भने छ ।

‘मैले राष्ट्रिय यू-१६ नखेली यहाँसम्मको यात्रा कठिन रहयो । क्यान नभएको अवस्थामा युवा खेलाडीलाई आफ्नो क्षमता देखाउनै निकै गाह्रो छ । यू-१९ लाई मैले क्रिकेट जीवनको ठूलो अवसरका रुपमा लिएको छु । यस अवसरलाई सदुपयोग गर्दै आउने दिनमा अझै माथिल्लो स्तरमा खेल्ने लक्ष्य छ । यसका लागि निरन्तर मिहिनेत जारि राख्ने छु,’ उनले टुंग्याए ।