काठमाडौं (हाम्रो खेलकुद) – नेपाली क्रिकेट टोलीले अघिल्लो महिना सिंगापुरमा भएको आइसिसी टि ट्वान्टी विश्वकप एसिया छनोटमा खराब प्रर्दशन गर्दै बाहिरियो । उपाधिको दाबेदारका रुपमा हेरिएको नेपालको त्यो प्रर्दशनले टोलीको स्तर,कप्तान,प्रशिक्षक र व्यवस्थापनमाथि नै प्रश्न उठ्यो ।

टि ट्वान्टी वरियतामा ११ औं स्थानमा रहेको नेपाल कतार र सिंगापुरसँग पराजित हुँदै बाहिरिएपछि कप्तान पारस खड्काले टोलीले क्षमता अनुसार खेल्न नसकेको बताए । शुक्रबार नेपाल, आयोजक सिंगापुर र जिम्बाबेबीच त्रिकोणात्मक सिरिजमा प्रतिस्पर्धा हुनेछ ।

नेपाल र जिम्बाबेको टोली सिंगापुर पुगिसकेका छन् । सिंगापुर क्रिकेट बोर्डले आगामी अक्टोबर १८ देखि नोभेम्बर २ सम्म यूएईमा हुने ग्लोबल टि ट्वान्टी विश्वकप छनोट अघि तयारी स्वरुप त्रिकोणात्मक सिरिज आयोजना गरेको हो । नेपाल खराब प्रर्दशन र जिम्बाबेलाई दुर्भाग्य भन्नुपर्छ आईसीसीलेनै प्रतिबन्ध लगाएपछि यी दुई टोली विश्वकप छनोटमा हुने छैनन् ।

नेपाल असोज १८ गतेदेखि २३ गतेसम्मा ओमानमा हुने टि ट्वान्टी सिरिज खेल्न सिंगापुरबाट त्यसतर्फ जानेछ । यी दुई सिरिजलाई नेपालले मंसिरमा स्वदेशमा आयोजना हुने १३ औं दक्षिण एसियाली खेलकुद (साग) अघि तयारीको रुपमा लिएको छ । त्यसैले टोलीमा युवा खेलाडीको बाहुल्यता छ ।

यी दुई सिरिजमा सागको तयारीमात्र हुने छैन,टि ट्वान्टीमा नेपाल कुन स्तरको टोली हो थाहा हुने छ । नेपाल ग्लोबल विश्वकप छनोट स्थान बनाउन सकेको भए प्रतिस्पधी टोली यीनै हुने थिए । प्रमुख प्रशिक्षक उमेश पटवालले सिंगापुरको हारपछि नेपाल विश्वकप छनोट खेल्न योग्य नरहेको अभिब्यक्ति दिदा आलोचित बन्नु परेको थियो ।

सिंगापुरसँग बदला लिने सोच
त्रिकोणात्मक सिरिजमा नेपालको एउटा सोच सिंगापुरसँग बदला लिने हुने छ । अर्को जिम्बाबेसँग पहिलो पटक टि ट्वान्टी अन्तर्राष्ट्रिय खेलमा उच्च प्रर्दशन गर्ने । अघिल्लो महिना आइसिसी टि ट्वान्टी एसिया विश्वकप छनोटको निर्णायक अन्तिम खेलमा सिंगापुरसँग ८२ रनले पराजित हुँदै नेपाल बाहिरिएको थियो ।

हारको पिडा खेलाडी र समर्थक दुबैले राम्रोसँग भुल्न नपाउँदै सिंगापुरमै उसैविरुद्ध पुन खेल्दै छ । नेपालको स्तर अघिल्लो महिना गरेको प्रर्दशन होइन भनेर सिद्ध गर्न सिंगापुर विरुद्ध खेलाडी उत्कृष्ट प्रर्दशन गर्ने सोचमा छन् । नेपाललाई बदला लिने यो सबैभन्दा राम्रो अवसर पनि हो ।

दुवै देश निलम्बनमा
नेपालले आईसीसी टि२० अन्तर्राष्ट्रिय मान्यता खेलमा जिम्बाबेसँग पहिलो खेल खेल्दै छ । दुर्भाग्य भन्नुपर्छ दुवै टोलीको घर भित्र क्रिकेटको अवस्था राम्रो छैन । दुवै आइसिसीको निलम्बनमा छन् । सरकारी हस्तक्षेपलगायतका कारण देखाउँदै दुवै देशका क्रिकेट संघमाथि निलम्बन छ ।

आईसीसीले जिम्बाबेलाई ग्लोबल टि ट्वान्टी प्रतिबन्ध लगायो । जसबाट दुखि हुँदै सिकन्दर राजा सहित थुप्रै खेलाडीले मार्मिक पोष्ट गरेका थिए । उपाधिको दाबेदार जिम्बाबे विश्वकप छनोट खेल्न नपाउनुको पिडा खेलाडीलाई मात्रै थाहा छ । जिम्बाबेको स्थानमा आईसीसीले ग्लोबल छनोटमा नाइजेरियालाई मौका दिएको छ ।

जिम्बाबेलाई यस सिरिजमा गुमाउनु केहि छैन । तर आफ्नो प्रर्दशन आईसीसी सहित विश्व समुदायलाई देखाउन भने छ ।
केहि दिन अघि सम्पन्न अफगानिस्तान र बंगलादेशसँगको त्रिकोणात्मक सिरिजमा खराब प्रर्दशन गरेको थियो । अन्तिम खेलमा अफगानिस्तानलाई ७ विकेटले हराउँदा अन्य खेलमा पराजित हुन पुगेको थियो ।

टि ट्वान्टी वरियतामा नेपाल ११ औं र जिम्बाबे १५ औं स्थानमा छन् । वरियतामा पछि रहेपनि टेष्ट राष्ट्र जिम्बाबे नेपालभन्दा बलियो मानिन्छ । जिम्बाबेसँग गत वर्ष एक दिवसिय विश्वकप छनोटमा नेपाल १ सय १६ रनले पराजित भएको थियो ।

नेपालको स्तर मापन
ओमान र सिंगापुरको टि ट्वान्टी सिरिजले नेपालको स्तर प्रष्ट पार्ने छ । ११ औं स्थानमा रहेको नेपालले एसिया टि ट्विान्टी विश्वकप छनोटमा २१ औं स्थानमा रहेको सिंगापुर र २२ स्थानमा रहेको कतारसँग पराजित हुँदै बाहिरिएको थियो ।

सिंगापुर र ओमान दुवै सिरिजमा अन्य टोली भन्दा नेपाल उच्च वरियतामामा रहेको टोली हो । तर मैदानमा नेपालले सबैभन्दा कमजोर प्रर्दशन गर्ने हो की भन्ने चिन्ता पनि छ।

जिम्बाबे,नेदरल्यान्ड्स,आयरल्यान्ड,हङकङ,ओमानसँगको प्रर्दशनले नेपाल मैदानमा कुन स्तरको टोली हो भन्ने बताउने छ । टि ट्वान्टी वरियतामा आयरल्यान्ड १४ औं जिम्बाबे १५ औं ,नेदरल्यान्ड्स १६ औं ,ओमान १८ औं ,हङकङ १९ औं र सिंगापुर २१ औं स्थानमा छ ।

त्रिकोणात्मक सिरिजमा नेपाली टोली
१.पारस खड्का (कप्तान), २.दीपेन्द्र सिंह ऐरी (उप कप्तान), ३.कुशल मल्ल, ४.इशान पाण्डे, ५.सोमपाल कामी, ६।सन्दीप लामछाने, ७।करण केसी, ८।ललित नारायण राजवंशी , ९.आरिफ शेख, १०.सन्दीप जोरा, ११.विनोद भण्डारी , १२.पवन सरार्फ , १३.अभिनाश बोहोरा, १४.रोहित कुमार पौडेल, १५.सुशन भारी ।