काठमाडौं (हाम्रो खेलकुद) – लामो समयदेखी विवादमा रहेको नेपाल क्रिकेट संघ (क्यान) निकास नजिक छ । क्यानमा सरकारी हस्तक्षेप सहित विभिन्न कारण देखाउँदै अन्तर्राष्ट्रिय क्रिकेट परिषद(आईसीसी) ले २०७३ देखि निलम्बन गरेको थियो ।

आईसीसीले आफ्नो विशेष पहलमा नेपाली क्रिकेटको विवाद समाधानको लागि पाँच सदस्य स्वतन्त्र समिती गठन गरेको थियो । उक्त स्वतन्त्र समितीले जिल्ला र प्रदेशको सफल निर्वाचन सकेपछि शुक्रबार र शनिबार राजधानीमा क्यानको निर्वाचन हुँदैछ । आइसिसीको निलम्बनमा रहेको क्यानको विधानसम्मत निर्वाचनसँगै निलम्बन फुकुवाका हुने आँकलन गरिएको छ । त्यसैले यस चुनावलाई विशेष महत्वका साथ हेरिएको छ । यस पटक चुनावी मैदानमा पुर्व अध्यक्ष विनयराज पाण्डे र चतुरबहादुर चन्द लड्ने निश्चित छ।

महासचिवको जिम्मेवारी निर्वाह गर्दै पाण्डेले झन्डै ५ वर्ष क्यानको अध्यक्षका रुपमा पनि नेतृत्व गरि सकेका छन् । सन् १९६५ देखी सन् २०१० को अन्त्य सम्म पाण्डेले क्यानको विभिन्न पदमा रहेर नेपाली क्रिकेटलाई योगदान दिई सकेका छन् । पाण्डे सन् २००५ देखी २०१० मा क्यानको अध्यक्ष थिए ।

यता चन्द बैतडीबाट प्रतिनिधि हुदै आएका छन् । चन्द २०७२ क्यानका अध्यक्षमा निर्वाचित भएका थिए । तर तत्कालिन अध्यक्ष टंक आङबुहाङको समूहले निर्वाचन बहिष्कार गरेको थियो । त्यसलाई आधार बनाएर राष्ट्रिय खेलकुद परिषद् (राखेप) का तत्कालिन सदस्य सचिव केशवकुमार विष्टले निर्वाचनलाई अस्वीकार गर्दै अहिलेका राखेप सदस्य सचिव रमेश सिलवालको अध्यक्षमा क्यान पुर्नगठन गरेका थिए । जसले गर्दा चन्दले अध्यक्षका रुपमा कुनै काम गर्न पाएनन् ।

दुवै समुहको चुनावी मैदानमा दौडधुप जारी छ । यी दुई समुहलाई विनोद मैनाली र मिङ्मा डान्डु शेर्पा समुहले आफूले भनेको पद दिने भए समर्थन गर्ने आश्वासन दिई रहेका छन् । पाण्डे अध्यक्ष हुँदा चन्द उपाध्यक्ष र मैनाली सदस्य थिए । चन्द अध्यक्ष हुँदा उनका निकट रहेका प्रथम उपाध्यक्ष विनोद मैनालीले यस पटक उनलाई साथ नदिने मनसाय गराएका छन् ।

सचिवमा अशोकनाथ प्याकुर्‍याल, उपाध्यक्षमा राजुबावु श्रेष्ठ र कोषाध्यक्षमा रोशन सिंहलाई उठाउने चन्द समुहको तयारी छ । सचिवमा पवन अग्रवाल र उपाध्यक्षमा उपेन्द्रप्रसाद भट्टराईलाई उठाउने तयारीमा पाण्डे छन् । तर दुवैलाई कुनै पनि औपचारीक घोषणा गरेका छैनन् । अध्यक्ष बाहेक अन्य पदमा सहमतीमै जान अन्तिम सम्म हर प्रयास गर्ने चन्द निकट एक जिल्ला प्रतिनिधि बताउछन् । नेपाली कांग्रेस निकट चन्दलाई जिल्ला प्रतिनिधिको राम्रो साथ छ । जिल्ला प्रतिनिधिको आग्रमा आफु निर्वाचन लड्न लागेको चन्द बताउछन् ।

आफैंले ४० वर्ष देखी हुर्काएर बढाएको क्रिकेटको वर्तमान अवस्था नाजुक रहेको हुँदा निकास दिन सक्छु भन्ने लागेर अध्यक्षमा उठ्ने निर्णय गरेको पाण्डेले बताए । यता चन्द भने आफु अध्यक्ष भएपछि क्यान निलम्बनमा परेपछि कामै गर्न नपाएको हुँदा अन्तिम पटक क्यानको नेतृत्व गर्ने इच्छा रहेको बताउछन् । अन्तर्राष्ट्रिय सम्बन्धमा चन्द भन्दा पाण्डे अब्बल मानिन्छन् । हालसम्म चुनाबी बाताबरण हेर्दा यस पटक क्यानमा नयाँ नेतृत्व नआउने निश्चित छ । पुरानै नेतृत्वबाट नेपाली क्रिकेट विकाशको लागि ठूलो आसा राखिएको छ ।

शनिबार हुने निर्वाचनबाट अध्यक्ष,उपाध्यक्ष,सचिव र कोषाध्यक्ष,१३ जना सदस्य सहित कुल १७ जना निर्वाचित हुने छन् । ३९ जिल्ला र २० प्रदेश प्रतिनिधि गरि कुल ५९ जनासँग मताधिकार हुने छ । अध्यक्षमा निर्वाचित हुन ३० मतको आवश्यकता पर्छ। त्यसैले मैनाली र शेर्पा समुहको समर्थन निर्णायक बन्न सक्छ ।