काठमाडौं (हाम्रो खेलकुद) – नेपाल क्रिकेट संघ (क्यान) को केन्द्रिय विशेष साधरण सभा काठमाडौंमा सुरु भएको छ । साधरण सभामामा प्रमुख अथिति खेलकुद मन्त्री जगत बहादुर विश्वकर्मा रहेका छन् । विशेष अथितिमा राष्टिय खेलकुद परिषदका सदस्य सचिव रमेश कुमार शिलवाल रहेका छन् ।

सभामा स्वतन्त्र समितीका सदस्य मोहम्मद अली,ठाकुर प्रताप थापा,लेख बहादुर क्षेत्री र नितिशा कोठारीले संयुक्त रुपमा अध्यक्षता गरेका छन् । स्वतन्त्र समितीका अधिवक्ता राजेश्वर श्रेष्ठ रहेका छन् । स्वतन्त्र समितीका सदस्य लेख बहादुर क्षेत्रीले स्वागत मन्तब्य राख्दै साधरण सभा सुरु भएको छ । क्यानको निर्वाचन शनिवार हुने छ ।

आईसीसीले आफ्नो विशेष पहलमा नेपाली क्रिकेटको विवाद समाधानको लागि पाँच सदस्य स्वतन्त्र समिती गठन गरेको थियो । उक्त स्वतन्त्र समितीले जिल्ला र प्रदेशको सफल निर्वाचन सकेपछि शुक्रबार र शनिबार राजधानीमा क्यानको निर्वाचन हुँदैछ ।

आइसिसीको निलम्बनमा रहेको क्यानको विधानसम्मत निर्वाचनसँगै निलम्बन फुकुवाका हुने आँकलन गरिएको छ । त्यसैले यस चुनावलाई विशेष महत्वका साथ हेरिएको छ । यस पटक चुनावी मैदानमा पुर्व अध्यक्ष विनयराज पाण्डे र चतुरबहादुर चन्द लड्ने छन् ।

शनिबार हुने निर्वाचनबाट अध्यक्ष,उपाध्यक्ष,सचिव र कोषाध्यक्ष,१३ जना सदस्य सहित कुल १७ जना निर्वाचित हुने छन् । ३९ जिल्ला र २० प्रदेश प्रतिनिधि गरि कुल ५९ जनासँग मताधिकार हुने छ । अध्यक्षमा निर्वाचित हुन ३० मतको आवश्यकता पर्छ।

क्यानमा सरकारी हस्तक्षेप सहित विभिन्न कारण देखाउँदै अन्तर्राष्ट्रिय क्रिकेट परिषद (आईसीसी) ले २०७३ देखि निलम्बन गरेको थियो ।