काठमाडौं (हाम्रो खेलकुद) – त्रिकोणात्मक सिरिजमा नेपालले टेष्ट राष्ट्र जिम्बावेलाई १ सय ३३ रनको सामान्य लक्ष्य दिएको छ । टस जितेर पहिला ब्याटिङ थालेको नेपालले निर्धारित २० ओभरमा ६ विकेट गुमाउँदै १ सय ३२ रन बनायो ।

नेपालका लागि उपकप्तान दीपेन्द्र सिंह ऐरीले सर्वाधिक ४० रनको योगदान दिए । कप्तान सन विलियम्सको १७ ओभरको तेस्रो बलमा तेन्दाइ चतराबाट क्याच आउट हुनुअघि दीपेन्द्रले ३३ बलमा ५ चौका प्रहार गरे । तल्लोक्रमका सोमपाल कामीले १४ बलमा ३ छक्का सहित २५ रनमा अविजित रहे । सोमपालले अन्तिम ओभरमा तेन्दाई चतरालाई सुरुवाती दुई बलमा लगातार छक्का प्रहार गरेका थिए । विकेटकीपर विनोद भण्डारी १२ बलमा १ चौका सहित ११ रनमा अविजित रहे ।

नेपालले दोस्रो ओभरको अन्तिम बलमा ओपनर इशान पाण्डेलाई ४ रनमा गुमाएको थियो । तेन्दाई चतराको बलमा लामो सट खेल्ने धुनमा क्याच आउट हुनुअघि इशानले ८ बलमा १ चौका प्रहार गरे । सातौ ओभरको चौथो बलमा आरिफ शेख ११ बलमा १ चौका सहित ८ रनमा क्याच आउट हुन पुगे । आठौं ओभरको तेस्रो बलमा रयान बुर्लको बलमा कप्तान पारस खड्का गलत सट खेल्दै १८ रनमा क्याच आउट भए । पारसले २२ बलमा ३ चौका प्रहार गरे ।

त्यस्तै डेब्यू खेल खेलेका युवा अलराउन्डर कुशल मल्लले पनि राम्रो प्रर्दशन गर्न सकेनन् । कप्तान पारस खड्का आउट भएसँगै मैदानमा उत्रेका मल्ल कप्तान सन विलियम्सको ११ औं ओभरको पहिलो बलमा ठूलो सटको धुनमा ६ बल खेली २ रनमा क्याच भएका छन् । कुशल नेपालबाट टि२० आईमा डेब्यू गर्ने २७ औं खेलाडीमा पर्दछन् ।

नेभिल मड्जिवको १६ औं ओभरको दोस्रो बलमा ठूलोे सटको धुनमा सन्दीप जोरा १७ रनमा क्याच आउट भए । जोराले १५ बलमा २ चौका प्रहार गरे । जिम्बावेका लागि कप्तान सन विलियम्सले ४ ओभरमा १९ रन खर्चेर २ विकेट लिए । वेलिंगटन मसाकाड्जा,नेभिल मड्जिव,तेन्दाइ चतरा र रयान बुर्लको नाममा समान १ विकेट रह्यो ।