पोखरा (हाम्रो खेलकुद) – एसियन क्रिकेट सिक्सेस टुर अन्तर्गत पोखरामा भएको नेपाल इन्टरनेसनल क्रिकेट सेभेन्स २०१९ को उपाधि हैदरावादको राजु क्रिकेट क्लबले जितेको छ ।

आइतबार पोखरामा भएको फाइनलमा राजु क्रिकेट क्लबले हैदरावादकै राजु एकेडेमीलाई ४ विकेटले पराजित गर्दै उपाधि जितेको हो । फाइनलमा राजु क्रिकेट क्लबका तरण म्यान अफ द म्याच भए । प्रतियोगीताको बाउलतर्फ उपाधि टिपटप देविबासले बंगलादेशको क्याभालिएर्सलाई हराउँदै आफ्नो पोल्टामा पार्यो । टिपटपको ४ विकेटको जितमा आशुतोष म्यान अफ द म्याच भए ।

बंगलादेशकै क्याभालिएर्स नोम्याड्सले थाइल्यान्डको सीबिबी क्रिकेट क्लबलाई हराउँदै प्लेट उपाधि जित्यो । थाइल्यान्डको सीबिबी एसकेले इंग्ल्यान्डको ब्लिथ्सवुडलाई हराउँदै शिल्ड उपाधि हात पार्यो । प्रतियोगिताको उत्कृष्ट ब्याट्सम्यान राजु क्रिकेट क्लबका प्रतिक पोवार तथा बलर एकेडेमीका विनय गौड भए । सर्वोत्कृष्ट खेलाडी एकेडेमीका प्रविन कुमारेडी घोषित भए ।

प्रतियोगिताको आयोजना एसियन क्रिकेट सिक्सेस टुर र देविबास इभेन्ट्स एन्ड मिडिया प्रालिको आयोजनामा भएको हो । तीनदिने प्रतियोगितामा ५ राष्ट्रका ८ टोलीले प्रतिस्पर्धा गरेका थिए । प्रतियोगिताको प्रवर्द्धनमा नेपाल पर्यटन बोर्डको साथ रहेको थियो भने होटल बाराही हस्पिटालिटी पार्टनरका रुपमा रहेको थियो ।