काठमाडौं (हाम्रो खेलकुद) – नेपाल क्रिकेट संघ (क्यान) को निर्वाचनमा चतुबहादुर चन्द नेतृत्वको प्यानल नै विजयी भएको छ । शनिबार राजधानीमा भएको १७ सदस्यीय कार्यसमिति निर्वाचनमा चन्दको प्यानलले फराकिलो जित पक्का गरेको हो । औपचारिक अन्तिम मतगणना हुन बाँकी रहेपनि आवश्यक मतान्तर पाएपछि प्यानलको जित पक्का बनेको हो ।

अध्यक्षका लागि चन्दले पूर्व अध्यक्ष विनयराज पाण्डेलाई ४४-१५ को भारी मतान्तरले पराजित गरेका हुन् । यस्तै उपाध्यक्षमा चन्द समूहकै राजुबाबु श्रेष्ठले मिङ्मा डन्डु शेर्पालाई पराजित गर्दै उपाध्यक्षमा निर्वाचित भए । सचिव पदमा अशोकनाथ प्याकुरेलले विनोदकुमार मैनालीलाई पराजित गरे । कोषाध्यक्षमा रोशन कुमार सिंहले उपेन्द्र भट्टाराईलाई हराए । यसअघि एकमात्र महिला सदस्यमा जयन्ती भट्ट निर्विरोध निर्वाचित भएकी छन् ।

प्रादेशिक सदस्यतर्फ सुदूरपश्चिम प्रदेशबाट बिक्रम विष्ट निर्विरोध निर्वाचित भएका छन् । कर्णालीबाट पदम बहादुर खड्का, ५ बाट प्रशान्त बिक्रम मल्ल, गण्डकीबाट ऋषि राम गौतम, प्रदेश २ बाट दाउद अन्सारी निविरोध भएका छन् ।

त्यस्तै प्रदेश १ बाट कैलाश विष्ट र प्रदेश ३ मा अमित वीर पाण्डे विजयी भए । सदस्यमा खुल्लातर्फ दुर्गाराज पाठक, विरेन्द्र चन्द, सञ्जय सिंह, करण मलहोत्रा र माधव कर्मचार्य निर्वाचित भए ।

निर्वाचनबाट अध्यक्ष, उपाध्यक्ष, सचिव र कोषाध्यक्ष तथा १३ जना सदस्यसहित कुल १७ जना निर्वाचित भएका  हुन् । ३९ जिल्ला र २० प्रदेश प्रतिनिधि गरि कुल ५९ जनासँग मताधिकार रहेको थियो ।