काठमाडौं (हाम्रो खेलकुद) – १३ औं दक्षिण एसियाली खेलकुद (साग) पुरुष टि ट्वान्टी क्रिकेटमा नेपाल पहिलो खेलमा श्रीलंका यू२३ सँग ६ विकेटले पराजित भएको छ । यो हारसँगै नेपालको फाइनल यात्रा अव अन्य टोलीको नतिजा र रन रेटमा पनि निर्भर रहनुपर्ने हुन्छ ।

१ सय ७३ रनको विजयी लक्ष्य पछ्याएको श्रीलंकाले १९.१ ओभरमा ४ विकेट गुमाउँदै पुरा गर्यो । श्रीलंकाकोे जितम शाम्मु आशान ४४ बलमा ४ चौका र ५ छक्का सहित ७२ रनमा अविजित रहँदै जित पक्का गरे ।

ओपनर निशान मदुशकाले ४२ बलमा ५ चौका र १ छक्का सहित ४६ रनको योगदान दिए । निशानलाई पवन सरार्फले १७ औं ओभरको तेस्रो बलमा दीपेन्द्र सिंह ऐरीबाट क्याच आउट गराए । चौथो विकेटका लागि शाम्मु र निशानले ९१ रनको साझेदारी गरेपछि नेपालको जित टाढिएको थियो ।

तेस्रो ओभरको अन्तिम बलमा सोमपाल कामीले पाथुम निसान्कालाई ३० रनमा क्याच आउट गराए । उनले १२ बलमा ३ चौका र २ छक्का प्रहार गरे । पाँचौ ओभरको पहिलो बलमा पवन सरार्फले कामिन्दु मेन्डिसलाई १ रनमा स्टम्पिङ आउट गराए । छैटौं ओभरको तेस्रो बलमा सुसन भारीले चारिथा आसालांकालाई ६ रनमा करण केसीबाट क्याच गराउँदै जितको आशा देखाएका थिए ।

तर त्यसपछि विकेट लिन नसक्दा नेपाल पराजित भएको हो । नेपालको फिल्डिङमा थुप्रै गल्ती गरेको थियो । पवन सरार्फले २ ओभरमा २० रन खर्चेर २ विकेट लिए । सुसन भारी र सोमपाल कामीको नाममा १-१ विकेट रह्यो ।

त्यसअघि टियु क्रिकेट मैदानमा टस हारेर ब्याटिङ थालेको नेपालले २० ओभरमा ५ विकेट गुमाउँदै १ सय ७२ रन बनाएको थियो । नेपालका उप कप्तान दीपेन्द्र सिंह ऐरी ४४ बलमा ४ चौका र ३ छक्का सहित ७२ रनमा अविजित रहे पनि टोलीको हार टार्न सकेनन् ।

पवन सरार्फ १३ बलमा २ चौका र १ छक्का सहित २२ रनमा क्याच आउट भए । पाँचौ विकेटका लागि पवन र दीपेन्द्रले ६२ रनको साझेदारी गर्दै नेपालाई बलियो योगफलमा पुर्याएका थिए । करण केसी १ रनमा नट आउट रहे । पुर्व कप्तान तथा ओपनर पारस खड्कालाई काविष्का अन्जुलाले दोस्रो ओभरको दोस्रो बलमा विकेटकीपर निशान मदुशंकाबाट १ रनमा क्याच आउट गराए ।

दोस्रो विकेटका लागि आरिफ शेख र कप्तान ज्ञानेन्द्र मल्लले ३१ रनको साझेदारी गर्दै नेपालको इनिङ उकास्न खोजेका थिए । राम्रो सुरुवात दिएका आरिफ छैटौं ओभरको पहिलो बलमा १९ रनमा क्याच आउट भए । कामिन्दु मेन्डिसको पहिलो बलमै ठूलो सटको धुनमा लङ अफमा आसेन बन्दराबाट क्याच आउट हुनुअघि आरिफले १५ बलमा २ छक्का प्रहार गरे । दुविन्दु तिलकरत्नेले आठौं ओभरको तेस्रो बलमा मल्ललाई २१ रनमा बोल्ड आउट गरे । ज्ञानेन्द्रले २० बलमा ३ चौका प्रहार गरे ।

चौथो विकेटका लागि विनोद भण्डारी र दीपेन्द्रले ५६ रनको साझेदारी गरेका थिए । १५ औं ओभरको पाँचौ बलमा कामिन्दुले विनोदलाई २१ रनमा बोल्ड आउट भए । विनोदले २३ बलमा १ चौका प्रहार गरे ।

श्रीलंका लागि स्पिनर कामिन्दु मेन्डिसले ४ ओभरमा ३४ रन खर्चेर २ विकेट लिए । दुविन्दु तिलकरत्ने, आसिता फ्रनान्डो र काविष्का अन्जुलाले १-१ विकेट लिए । नेपालले दोस्रो खेलमा विहीवार भुटानसँग खेल्ने छ ।