काठमाडौं (हाम्रो खेलकुद) – १३ औं दक्षिण एसियाली खेलकुद (साग) पुरुष टि ट्वान्टी क्रिकेट अन्तर्गत नेपालले आफ्नो दोस्रो खेलमा भुटानसँग खेल्दै छ । खेल बिहान ९ बजेबाट टियु क्रिकेट मैदान कीर्तिपुरमा सुरु हुने छ ।

दुवै टोली पहिलो जितको खोजिमा छन् । नेपाल पहिलो खेलमा श्रीलंका यू२३सँग ६ विकेटले पराजित भएको थियो । भुटान श्रीलंका यू२३सँग १ सय ७३ रनको फराकिलो अन्तरको हार बेहोरेको थियो । अन्तर्राष्ट्रिय क्रिकेट परिषद (आईसीसी) ले आफ्ना सबै सदस्य राष्ट्रलाई टि ट्वान्टी आईको मान्यता दिएको छ । त्यसैले आजको खेलमा टि ट्वान्टी आईको मान्यता छ ।

भुटान नेपाल भन्दा तुलनात्मक रुपले धेरै कमजोर टोली मानिन्छ । टि ट्वान्टी वरियतामा नेपाल १२ औं र भुटान ६९ अौं स्थानमा छन् । यसैबाट यी दुईबीचको स्तर थाहा हुन्छ । भुटानसँगको जित नेपालको लागि सहज देखिन्छ । कसरी जित्छ त्यो हेर्न बाँकी छ । भुटानसँग नेपाल पराजित भए आश्चर्यनै हुने छ ।

भुटानसँग नेपाललाई घरेलु मैदानमा जितसँगै विश्व कीर्तिमान बनाउने राम्रो अवसर पनि छ । आज भुटानविरुद्ध नेपाल र खेलाडीको नाममा केहि कीर्तिमान बन्न सक्छन् । बनेका कीर्तिमान सुधार हुन सक्छ । विश्व क्रिकेटमा नेपालले बनाएका धेरै कीर्तिमान कागजी रुपमा कमजोर टोलीविरुद्धनै छन् । सागमा स्पिनर अञ्जली चन्दले माल्दिभ्सविरुद्ध २.१ ओभरमा कुनै रन नदिई ६ विकेट लिएको होस् वा म्यानमारविरुद्ध २ बलमै जितेको कीर्तिमान ।

कप्तान ज्ञानेन्द्र मल्ल र पारस खड्काले ओपनिङ गर्ने छन् । श्रीलंकाविरुद्ध ७२ रनको उत्कृष्ट अविजित इनिङ खेलेका उप कप्तान दीपेन्द्र सिंह ऐरीबाट त्यस्तै आशा गरिएको छ । श्रीलंकाविरुद्ध १ रनमा आउट भएका ओपनर पारस खड्काले पनि ठूलो इनिङ खेल्न सक्छन् । आरिफ शेख, पवन सरार्फ विनोद भण्डारी मध्यक्रम समाल्ने छन् ।

कमजोर भुटानबिरुद्ध प्रमुख खेलाडीलाई आजको खेलमा आराम दिदै पहिलो खेलमा बेन्चमा बसेका कुशल भुर्तेल, रोहित कुमार पौडल, सन्दीप जोरा र राशिद खानले मौका पाउन सक्छन् । भुटानविरुद्ध सोमपाल कामी र करण केसी मध्य एकलाई बेन्चमा राख्दै युवा तीब्र गतिका बलर राशिद खानले डेब्यू गर्न सक्ने संभावना रहन्छ । स्पिनरमा ललित नारायण राजवंशी र सुसन भारीको जोडीलेनै निरन्तरता पाउने छन् ।

भुटानको कप्तानी जिग्मे सिंग्येले गर्ने छन् । श्रीलंकाविरुद्ध रञ्जुङ मिक्यो दोर्जेले २२ र सोनम तोबगे १० रन बनाउन बाहेक अन्यले दोहोरो अकंमा रन जोड्न सकेका थिएनन् । नेपाल र भुटानबीच पछिल्लो समय गत वर्ष अक्टोबरमा आईसीसी विश्वकप टि ट्वान्टी एसिया रिजन बी मा १ सय १७ रनको फराकिलो अन्तरले हराएको थियो । जुन खेलमा नेपालले १ सय ५० रन बनाउदा भुटान ३३ रनमा अल आउट भएको थियो ।

यो पनि : ‘स्वर्ण जितें, अब विदेश जान्न’ – नेपाललाई सागमा सयौं स्वर्ण दिलाउन सफल सक्षम कार्कीको भोगाई