एजेन्सी – कप्तान बाबर आजम र मोहम्मद हफिजको उत्कृष्ट ब्याटिङमा पाकिस्तानले बंगलादेशलाई दोस्रो टि ट्वान्टी खेलमा ९ विकेटले पराजित गर्दै एक खेल अगावै टि ट्वान्टी सिरिज २-० ले जितेको छ ।

बंगलादेशले प्रस्तुत गरेको १ सय ३७ रनको लक्ष्य घरेलु टोली पाकिस्तानले १६.४ ओभरमा १ विकेट गुमाउँदै पुरा गर्यो । पाकिस्तानको सहज जितमा कप्तान बाबर आजम ४४ बलमा ७ चौका र १ छक्का सहित ६६ रनमा अविजित रहँदै म्यान अफ द म्याच चुनिए । त्यस्तै मोहम्मद हफिज ४९ बलमा ९ चौका र १ छक्का सहित ६७ रनमा अविजित रहे । ओपनर आशन अली शून्यमा आउट भए । बाबर र हफिजले दोस्रो विकेटका लागि १ सय ३१ रनको शतकीय अविजित साझेदारी गर्दै सहज जित पक्का गरे ।

त्यस अघि टस जितेर ब्याटिङ थालेको बंगलादेशले निर्धारित २० ओभरमा ६ विकेट गुमाउँदै १ सय ३६ रन बनाएको थियो । बंगलादेशका ओपनर तमिम इकवालले ५३ बलमा ७ चौका र १ छक्का सहित ६५ रनको योगदान दिए । अफिफ हुसैन २० बलमा १ चौका र १ छक्का सहित २१ रनको योगदान दिए । कप्तान महमुदुल्ला १२, सौम्य सरकार ५ र लिटन दासले ८ रन जोडे । पाकिस्तानका युवा खेलाडी मोहम्मद हसनैनले २, हरिस रउफ शाहिन अफ्रिदी र सादब खानले १-१ विकेट लिए ।

पहिलो टि ट्वान्टी खेलमा पाकिस्तान ५ विकेटले विजयी भएको थियो । तेस्रो तथा अन्तिम खेल सोमबार हुने छ ।