काठमाडौं (हाम्रो खेलकुद) – नेपाल घरेलु मैदानमा भएको पहिलो ओडीआई खेलमा ओमानसँग पराजित भएको छ । खराब ब्याटिङको कारण आईसीसी विश्वकप लिग-२ त्रिकोणात्मक सिरिज अन्तर्गत पहिलो खेलमा नेपाल बुधबार ओमानसँग १८ रनले पराजित हुन पुग्यो ।

ओमानले प्रस्तुत गरेको १ सय ९८ रनको लक्ष्य पछ्याएको नेपाल ४६.५ ओभरमा १ सय ७९ रनमा अल आउट भयो । तीव्र गतिका बलर करण केसी र स्पिनर सुशन भारीको उत्कृष्ट बलिङमा एक समय खेल पूर्णरुपमा नेपालको पक्षमा थियो । टस जितेर फिल्डीङ रोज्ने निर्णय सहि पनि थियो । तर पहिलो इनिङमा केहि सानो गल्तिले दोस्रो इनिङमा सम्हालिन नसक्दा नेपाल पराजित हुन पुग्यो । नेपालले ओमानसँग हार्नुको प्रमुख चार कारण यस प्रकार छन् ।

४. कमजोर फिल्डिङ

नेपालले सुरुवात देखि नै उत्कृष्ट प्रर्दशन गरेको थियो । करण केसीले पहिलो ओभरको अन्तिम बलमा जतिन्दर सिंहलाई आउट गरे । त्यसपछि अर्का प्रमुख खेलाडी अकीब इलियासलाई पनि करणले आउट गरेपछि सुशन भारीले ओमानको मध्यक्रम ध्वस्त बनाएका थिए । जसको कारण नेपाल निरन्तर हावी बनिरहेको थियो । ओमानका ब्याट्सम्यानले खुलेर खेल्न सकिरहेका थिएनन् । दीपेन्द्रसिंह ऐरीले अकिब इलियासलाई उत्कृष्ट रन आउट गरेपछि नेपाल बलियो स्थितिमा थियो ।

तर इनिङ अगाडी बढ्दै जाँदा नेपालले फिल्डिङमा गल्ति गर्न पुग्यो । फिल्डिङमा रन रोक्न सकेको भए योगफल अझ कम हुने थियो । नेपालले थुप्रै पटक फिल्डिङमा गल्ती गरेको थियो । दीपेन्द्रबाहेक अन्यको फिल्डिङ कमजोर रह्यो ।  जसको फाइदा ओमानका ब्याट्सम्यानले उठाए ।

३. गौड र नदीमको साझेदारी

एक समय ओमान १९ ओभरमा ५७-५ को कमजोर अवस्थामा पुगेको थियो । नेपाली बलर ओमानमाथि हावी रहेका थिए । तर सन्दीप गौड र मोहम्मद नदीमले छैटौं विकेटका लागि ६० रनको महत्वपूर्ण साझेदारी गरे । जसले अन्त्य तिर ओमानका ब्याट्सम्यानले आक्रामक ब्याटिङ गर्न सहज बन्यो । जुन साझेदारी समयमै तोड्न सकेको भए ओमान कम योगफलमा समेटिन सक्थ्यो ।

नयाँ खेलाडीलाई दबाबमा रन बनाउन कठिन पर्छ । तर त्यसो हुन सकेन । अर्कोतर्फ नेपालका प्रमुख दुई बलर अभिनाश बोहरा र सन्दीप लामिछानेले विकेट लिन सकेनन् । जसको कारण पनि ओमानले बलियो योगफल तयार पार्न सफल भयो । छैटौं रनको साझेदारी कम रनमा समेटिएको भए खेल नेपालको पक्षमा आउन सक्थ्यो ।

२. कमजोर डेथ ओभर

नेपाली बलरले ओमानका ब्याट्सम्यानलाई ४० ओभर सम्म पूर्ण रुपमा दबाबमा राखेका थिए । एक सयम ओमान १ सय ५० रनको आसपासको योगफलमा सम्भावना देखिएको थियो । ४० ओभरमा ओमान १२१-६ को अवस्थामा थियो । जसमा करण, सन्दीप र अभिनाशको स्पल बाँकी हुँदा ओमानबाट ओमानबाट बढीमा १ सय ७० सम्मको योगफलको आशा गरिएको थियो ।

तर ओमानले अन्तिम १० ओभरमा ७६ रन जोड्न सफल रह्यो । जुन रन ओमानको जितको आधार बन्यो । करणले अन्तिम ओभरमा १७ रन खर्चेका थिए । उसका मोहम्मद नदीम ९६ बलमा ५ चौका र २ छक्का सहित ६९ रनमा अविजित रहँदै जित पक्का गरे । नेपालले अन्तिम १० ओभरमा ५० रन भन्दा कम खर्चिन सकेको भए खेल नेपालको पक्ष्यमा जान सक्थ्यो ।

१. पारस र ज्ञानेन्द्रको खराब ब्याटिङ

ओमानसँग हार्नुको प्रमुख कारणनै कप्तान ज्ञानेन्द्र मल्ल र पारस खड्काको खराब ब्याटिङ हो । एक दिवसियमा १ सय ९८ रनको लक्ष्य सामान्य मानिन्छ । यता कमजोर ओपनिङको कारण बलियो बनाउन पारस र ज्ञानेन्द्रले ओपनिङ गर्न मैदान उत्रेका थिए । ज्ञानेन्द्र र पारसले ४०,५० रनको साझेदारी गर्दै सुरुवात दिलाएको भए मध्यक्रमका ब्याट्सम्यानलाई खेल्न सहज हुने थियो । सुरुवाती दुई ओभर मेडन  खाएका पारस र ज्ञानेन्द्र केहि दबाबमा देखिएका थिए ।

चौथो ओभरको पाँचौ बलमा दबाबको कारण कलीमुल्लाहको बलमा खराब सट खेल्दै ज्ञानेन्द्र १ रनमा क्याच आउट भए । योगफल अनुसार नेपालले सुरुवाती दश ओभरमा रन भन्दा पनि विकेट जोगाउन बढी ध्यानदिनु पर्ने थियो । लगातार ४ बल डट खाएका ज्ञानेन्द्र दवावमा आउँदै खराब सट खेल्न पुग्दा क्याच आउट हुन पुगेका थिए । ज्ञानेन्द्र आउट भएसँगै अझ बढि जिम्मेवारी पारसमा थपिएको थियो । जुन समय नेपाली ब्याट्सम्यानलाई बाउन्डी भन्दा डबल सिंगल रनको वढी आवश्यक थियो । जसले ओमानका बलरलाई दबाब सिर्जना गर्न सक्थ्यो ।

तर ज्ञानेन्द्र आउट भएको तीन बलपछि अर्थात बिलाल खानको पाँचौ ओभरको तेस्रो पारस बाउन्डीको आशामा सट खेल्नेक्रममा ३ रनमा विकेटकिपर सुरज कुमारबाट क्याच हुँदै पेभिलिएन फर्केपछि ओमान हावी बनेको थियो । पारस र ज्ञानेन्द्र आउट हुँदा नेपालले स्कोरमा ४ रन मात्रै जोडेको थियो । जसको असर मध्यक्रमका युवा खेलाडी आरिफ शेख, दीपेन्द्र सिंह ऐरी, रोहित कुमार पौडेललाई पर्यो ।

उत्कृष्ट ब्याटिङको लागिनै शीर्षक्रमबाट ओपनिङ आएपनि जिम्मेवारी इनिङ खेल्न नसक्दा नेपाल पराजित हुन पुगेको हो । ज्ञानेन्द्रले पनि हारको मुख्य कारण दुवै ओपनर सस्तैमा आउट हुनु बताएका चन । मध्यक्रममा शरदले ५५ रन बनाउँदा दीपेन्द्र ३६, आरिफ शेख ६ र रोहित कुमार पौडेल शून्यमा आउट भए । कमजोर ब्याटिङका साथै ज्ञानेन्द्र र पारसको गैरजिम्मेवार इनिङ आज ओमानसँगको हार्नुको प्रमुख कारण हो ।