काठमाडौं (हाम्रो खेलकुद)– जुन सुकै क्षेत्रमा लाग्दा पनि त्यसको सबैभन्दा माथिल्लो तहमा पुग्ने सपना अधिकांशको हुन्छ नै । क्रिकेट अम्पायर दुर्गानाथ सुवेदी (देवेन्द्र) ले आफ्नो क्षेत्रमा त्यस्तै एउटा सपना पुरा गरेका छन् । उनले घरेलु मैदानमै एकदिवसीय अन्तर्राष्ट्रियमा (ओडीआई) मा डेब्यू गरेका छन् ।

कीर्तिपुरस्थित टियु मैदानमा जारी त्रिकोणात्मक सिरिज अन्तर्गत बिहीबार ओमान र अमेरिकाबीचको खेल खेलाउँदै सुवेदीले ओडीआईमा डेब्यू गरेका हुन् । ओडीआई खेलाउने उनी दोस्रो नेपाली अम्पायर हुन् । यसअघि विभिन्न एसोसिएट राष्ट्र सम्मिलित लिस्ट ए र टि२० प्रतियोगितामा अम्पायरिङ गरिसकेका सुवेदीले यसै प्रतियोगितामा अवसर पाएका हुन् ।

‘अम्पारिङमा लाग्दा देखि नै कुनै दिन एक दिवसीय र टेष्ट क्रिकेट खेलाउने भन्ने सपना छ । अहिले ओडीआई खेलाउने सपना पुरा भएको छ,’ ४३ वर्षे सुवेदीले हाम्रो खेलकुदसँग भने,‘घरेलु मैदानमै यो अवसर जुट्नु मेरा लागि गौरवको क्षण हो ।’

सुवेदीले सन् २००६ देखि अन्तर्राष्ट्रिय क्रिकेटमा अम्पायरिङ गर्दै आएका छन् । उनीसँगै आइसिसी डेभपलमेन्ट अन्तर्राष्ट्रिय प्यानलमा नेपालका बुद्धिबहादुर प्रधान र विनयकुमार झा छन् । प्रधान एकदिवसिय अन्तर्राष्ट्रिय खेलाउने पहिलो नेपाली हुन् । अम्पायर सुवेदी नेपाली खेलकुद पत्रकारको क्रियाशील संस्था नेपाल खेलकुद पत्रकार मंचका अध्यक्ष समेत हुन् ।