एजेन्सी – क्यारेबियन प्रिमियर लिग (सिपिएल) अन्तर्गत जमैका तलावाजले चौथो खेलमा गुयाना एमेजन वारियार्सलाई ५ विकेटले पराजित गरेको छ । जमैकाको दोस्रो जितमा नेपाली स्पिनर सन्दीप लामिछानेले राम्रो प्रदर्शन गरे ।

गुयानाले प्रस्तुत गरेको १ सय ९ रनको लक्ष्य जमैकाले १८ ओभरमा ५ विकेटको क्षतिमा पूरा गर्यो । जमैकाको जितमा क्रुमा बोनरले सर्वाधिक ३० रनको योगदान दिए । रसेलले नटआउट २३ रन जोडे । गुयानाका नविन उल हकले २ तथा इमरान ताहिर, अस्मिड नेड र किमो पलले १-१ विकेट हात पारे ।

सामान्य लक्ष्य पछ्याउने क्रममा जमैकाले राम्रो सुरुवात पाउन सकेन । दोस्रो ओभरको चौथो बलमा नै ओपनर चाडविक वाल्टन आउट भए । इमरान ताहिरले १ रनमा खेलिरहेका वाल्टनलाई बोल्ड गरेका थिए । त्यसपछि ग्लेन फिलिप्स र जर्मेन ब्लाकवुडले दोस्रो विकेटका लागि राम्रो साझेदारी गरे ।

पाँचौ ओभरको चौथो बलमा नविन उल हकको बलमा क्याचआउट हुनुअघि फिलिप्सले १८ बलमा २६ रन जोडे । समान २ चौका र २ छक्का प्रहार गरेका फिलिप्स आउट हुँदा तलावाज ४०-२ को स्थितिमा थियो । आठौं ओभरको दोस्रो बलमा आसिफ अली आउट भए । अली ६ बलमा ३ रन जोड्दै किमो पलको बलमा क्रिस ग्रिनबाट समातिए ।

लगत्तै अर्को ओभरमा कप्तान रोभमान पावेल पनि पेभेलियन फर्किए । ठूलो सट खेल्ने धुनमा अश्मिड नेडको बलमा उनलाई विपक्षी कप्तान ग्रिनले लङ अन बाउन्ड्रीमा क्याच आउट गरे । पावेल ५ बलमा २ रन जोडेर आउट हुँदा टोली ५३-४ को स्थितिमा पुग्यो । ११ औं ओभरमा जर्मेन ब्लाकवुड नविन उल हकको बलमा कट बिहाइन्ड आउट भए । १९ बलमा २३ रन जोडेका ब्लाकवुडको विकेटसँगै जमैका ६२-५ को स्थितिमा पुग्यो ।

छैटौं विकेटका लागि आन्द्रे रसल र क्रुमा बोनरले साझेदारी गर्दै टोलीलाई जितसम्म पुर्याए । यी दुईले अर्धशतकीय साझेदारी गर्दै ४७ बलमा ५१ रन जोडे । बोनरले ३२ बलमा ३ चौका र १ छक्कासहित नटआउट ३० रन बनाए । रसेल २० बलमा १ चौका र २ छक्कासहित २३ रनमा नटआउट रहे ।

त्यसअघि पहिलो ब्याटिङ गरेको गुयानाले २० ओभरमा ९ विकेट गुमाउँदै १ सय ८ रनमात्र जोड्न सक्यो । टोलीका लागि रोस टेलरले सर्वाधिक २५ रनको योगदान दिए । जमैकाका लागि सन्दीपले ४ ओभरमा मात्र १२ रन खर्चेर १ विकेट हात पारे । मुजिबले ४ ओभरमा ११ रन दिँदै ३ विकेट लिए । एडवार्ड्सले ३ विकेट तथा रसेलले १ विकेट लिए ।

टस जितेर फिल्डिङ रोजेको जमैकाले इनिङको पहिलो बलमा नै विकेट लिन सफल भयो । फिडेल एडवार्ड्सले ब्रेन्डन किंगलाई पहिलो बलमा नै बोल्ड गर्दै उत्कृष्ट सुरुवात दिलाए । त्यसपछि ब्याटिङमा आएका शिम्रन हेटमायर पनि लामो समय टिकेनन् । दोस्रो ओभरको अन्तिम बलमा मुजिबले उनलाई ५ रन जोडेको अवस्थामा एलबीडब्लु धरापमा पारे ।

लगातार रनगति रोकेर दबाब दिएको जमैकाले पाँचौ ओभरमा अर्को सफलता हात पार्यो । ओपनर एन्थोनी ब्राम्बल १९ बलमा मात्र ७ रन जोड्दै एडवार्ड्सको शिकार भए । ठूलो सट खेल्ने धुनमा उनी डिप मिडविकेटमा रोभमान पावेलबाट समातिए । ५ ओभरको समाप्तिमा गुयाना १८-३ को स्थितिमा रहेको थियो ।

छैटौं ओभरमा रस टेलरले आन्द्रे रसेलको बलिङमा आक्रमण गर्दै १२ रन जोड्दै खेलमा फर्काउने प्रयास गरे । पुरन र टेलरले विकेट जोगाउँदै रन गति बढाउने काम गरे । १० ओभरको समाप्तिमा गुयानाले खेल सुधार्दै ५३-३ को स्थिति बनायो ।

११ औं ओभरमा मुजिब आक्रमणमा फर्केसँगै गुयानाले निकोलस पुरनलाई गुमायो । चौथो बलमा पुरन १५ रनमा खेलिरहँदा मुजिबले बोल्ड गर्दै टोलीलाई चौथो सफलता दिलाए । लगत्तै अर्को ओभरको पहिलो बलमा सन्दीपले शेर्फान रदरफर्डको विकेट लिए । रदरफर्ड ठूलो सट खेल्ने धुन्न्मा एज लागेर आसिफ अलीको हातबाट समातिए । मात्र १ रन जोडेका उनी आउट हुँदा टोली ५६-५ को दयनीय अवस्थामा थियो ।

१३ औं ओभरको तेस्रो बलमा रसेलले रोस टेलरको महत्त्वपूर्ण विकेट हात पारे । रसेलले २१ बलमा २५ रन जोडेर खेलिरहेका टेलरलाई एलबीडब्लु धरापमा पारेपछि गुयाना ६१-६ को अवस्थामा पुग्यो । १५ औं ओभरको पहिलो बलमा कप्तान क्रिस ग्रिन आउट भए । मुजिबको बलमा कप्तान रोभमान पावेलले पहिलो स्लिपमा क्याच लिँदै १ रन जोडेका ग्रिनलाई पेभेलियन फर्काए ।

१९ औं ओभरको दोस्रो बलमा एडवार्ड्सले पललाई आउट गरे । पल २० बलमा मात्र ९ रन जोड्दै एडवार्ड्सको एलबीडब्लु धरापमा परे । गुयानाका नविन उल हक २० बलमा २० रन जोड्दै नटआउट रहे । इमरान ताहिरले ९ रन जोडे । ताहिर अन्तिम बलमा तेस्रो रन कुद्ने क्रममा रनआउट भएका थिए ।

यस्तो रहयो सन्दीपको बलिङ:

दशौं ओभरमा बलिङ गर्न आएका सन्दीपले पहिलो बलमा निकोलस पुरनलाई डट गराएपछि दोस्रो बलमा २ रन दिए । तेस्रो बलमा पुरनले एक रन लिए । चौथो बलमा रोस टेलर बिट भए भने अन्तिम दुई बलमा उनले कुनै रन जोड्न सकेनन् । पहिलो ओभरमा सन्दीपले ३ रन खर्चिए ।

१२ औं ओभरको पहिलो बलमा नै सन्दीपले विकेट हात पारे । उनले ठूलो सट खेल्ने धुनमा रहेका शेर्फान रदरफर्डलाई एक्स्ट्रा कभरमा रहेका आसिफ अलीको हातबाट क्याच आउट गराए । दोस्रो बल गर्ने क्रममा वाइड फ्याँकेका उनले लगातार तीन बल डट राखे । पाँचौ बलमा १ रन दिएका उनले अन्तिम बलमा २ रन खर्चिए । समग्रमा दोस्रो ओभरमा सन्दीपले ४ रन दिँदै १ विकेट लिए ।

१४ औं ओभरको पहिलो बलमा सन्दीपले क्रिस ग्रिनलाई बिट गरे । दोस्रो बलमा रन लिन नसकेका ग्रिनले तेस्रो बलमा १ रन जोडे । त्यसपछि किमो पललाई लगातार तीन बल डट राख्दै सन्दीपले अर्को कसिलो ओभर समापन गरे । उनले तेस्रो ओभरमा जम्मा १ रन खर्चिए ।

१६ औं ओभरको पहिलो बलमा सन्दीपले १ रन दिए । दोस्रो बलमा नविन उल हकले रिभर्स स्विपमा २ रन जोडे । त्यसपछि लगातार तीन बल डट गरेका सन्दीपले अन्तिम बलमा १ रन दिए । अन्तिम ओभरमा सन्दीपले ४ रन खर्चिए ।

समग्रमा सन्दीपले ४ ओभरमा मात्र १२ रन खर्चेर १ विकेट हात पारे ।