एजेन्सी – नेपाली लेग स्पिनर सन्दीप लामिछाने सम्मिलित जमैका तलावाजले क्यारेबियन प्रिमियर लिग (सिपिएल) को १४ औं खेलमा साविक विजेता बार्बाडोस ट्राइडेन्सविरुद्ध खेल्दैछ ।

खेल बिहीबार विहान ३ः१५ देखि क्विन्स पार्क ओभलमा सुरु हुने छ । जमैका ४ खेलमा समान २ मा जित र हार सहित चौथौ स्थानमा छ । बार्बाडोस ४ खेलमा १ मा जित र ३ मा हार सहित पाँचौ स्थानमा छ । बार्बाडोसलाई जित्नै पर्ने दबाब छ ।

साविक विजेता बार्बाडोसमा अफगानिस्तानका स्पिनर राशिद खान, वेस्टइन्डिजका जेसन होल्डर, विकेटकिपर शाई होप, हेडन वाल्श, न्युजिल्यान्डका स्पिनर मिचेल सान्टनार र अलराउन्डर कोरी एन्डरसन जस्ता खेलाडी छन् । राशिद प्रमुख हतियार हुन् ।

जमैकामा मुजिब उर रहमान, आन्द्रे रसेल, ग्लेन फिलिप्स, फिडेल एडवार्ड्ससले उच्च प्रर्दशन गर्दै आएका छन् । सन्दीपले सिपिएलमा ४ खेलमा ५ विकेट लिएका छन् । मुजिब ४ खेलमा ९ विकेट लिएका छन् । उत्कृष्ट लयमा रहेका मुजिब बार्बाडोसविरुद्ध पनि नायक बन्न सक्ने अनुमान गरिएको छ । बार्बाडोसका राशिद र मिचेल सान्टनार तथा जमैका मुजिब र सन्दीपको स्पिनर जोडी एकआपस भिड्दा खेल रोचक हुने अनुमान गरिएको छ ।

ओपनर चाडविक वाल्टन र कप्तान रोभमान पावेललाई भने ठूलो इनिङ खेल्न आवश्यक छ । यी दुई ब्याट्सम्यानको खराब लय जमैकालाई चिन्ताको विषय हो । हेड टु हेडमा बार्बाडोस भन्दा जमैका अघि छ । यी दुई क्लबबीच सिपिएलमा कुल १४ खेल भएको छ । जसमा जमैका ८ खेलमा विजयी हुँदा ५ खेलमा पराजित भएको छ । एक खेल नतिजा बिहीन छ ।

सन्दीपको प्रर्दशन

स्पिनर सन्दीप लामिछानेले एक खेलमा दुई विकेट लिदा अन्य तीनमा १–१ विकेट लिएका छन् । सन्दीपले पहिलो खेलमा सेन्ट लुसिया जुक्सविरुद्ध ४ ओभरमा २३ रन खर्चेर १ विकेट र दोस्रो खेलमा ट्रीनबेगो नाइट राइडर्सविरुद्ध ४ ओभरमा ३० रन खर्चेर १ विकेट लिएका थिए । गुयाना एमेजन वारियर्सविरुद्ध ४ ओभरमा ८ रन खर्चेर २ विकेट लिएका थिए । चौथो खेलमा गुयानाविरुद्धनै ४ ओभरमा १२ रन खर्चेर १ विकेट लिएका थिए ।