काठमाडौं (हाम्रो खेलकुद) – नेपाल क्रिकेट संघ (क्यान) ले राष्ट्रिय क्रिकेट पुरुष टोलीको मुख्य प्रशिक्षक पदपूर्तिको लागि सूचना प्रकाशित गर्ने निर्णय गरेको थियो ।

क्यानले साउन ५ मा मुख्य प्रशिक्षकसँगै, महाप्रबन्धक, वित्त प्रबन्धक र क्रिकेट व्यवस्थापकको पदपूर्ति सूचना आइसिसीसँग समन्वय गर्दै एक हप्तामा निकाल्ने प्रेस विज्ञप्ति मार्फत जानकारी दिएको थियो । तर उक्त प्रेस विज्ञप्ति निकालिएको एक महिना भन्दा बढि समय बित्दा हालसम्म सूचना प्रकाशित हुन सकेको छैन ।

क्यानका सचिव अशोकनाथ प्याकुरेलले यस विषयमा आइसिसीले काम गरिरहेको बताउँछन् । ‘आइसिसीसँग समन्वय गरेर हामीले हाम्रो तर्फबाट गर्नुपर्ने सबै काम पेश गरेको दुई तीन हप्ता भई सक्यो । आइसिसीले काम गरिरहेको छ । आइसिसीले जतिसक्यो चाडैं हुन्छ भनेपछि हामी निकाल्न तयार भएर बसेका छौं’, प्याकुरेलले भने ।

आइसिसीको भनाइअनुसार अर्को हप्ता भित्र अनुमति आईसक्नेमा प्याकुरेल आशावादी छन् । क्यानले भदौमा गर्ने तयारी गरेको आफ्नो वार्षिक साधरण सभा कोरोना महामारीको कारण अनिश्चित समय सम्म मंगलबार स्थगित गरेको जनाइसकेको छ । कोरोना महामारीको कारण तत्काल बोर्ड बैठकको पनि सम्भावना कम छ । यो अवस्थामा पदपूर्ति भने प्रभावित नहुने प्याकुरेल बताउँछन् ।

‘यी सबै कार्य सम्पादन समितिले निर्णय गरेर आइसिसीलाई पठाएको हुँदा अव पदपूर्तिको लागि बोर्डको आवश्यक पर्दैन’, उनले भने ।

‘आइसिसीको आफ्नै प्रकिया हुन्छ । उहाँहरुले विभिन्न तहमा छलफल गरेर हामीसँग पनि कुरा गरेर फाइनल गर्नुहुन्छ । त्यो काम आइसिसीको सकिएको छैन । हामीले त्यहिँ पर्खेका छौं, उनले भने, ‘कुन तहको प्रशिक्षक लिने, पारिश्रमिक कतिसम्म दिने, कुन प्रकियाले छनोट गर्ने, कस्तो कमिटीले छान्ने लगायतका धेरै कुराहरु आइसिसीले गर्ने काममा पर्दछन् ।’