एजेन्सी – इंग्ल्यान्ड र पाकिस्तानबीचको तीन खेलको टि२० आई सिरिज अन्तर्गत पहिलो खेल आज म्यानचेस्टरमा हुँदै छ । खेल नेपाली समयअनुसार शुक्रबार राती १०ः ४५ पछि सुरु हुनेछ ।

कोरोना महामारीपछि पहिलोपटक पुरुष टि२० आई हुन लागेको हो । तीन टेष्ट सिरिज १–० ले गुमाएको पाकिस्तान टि२० सिरिज जित्ने सोचका साथ मैदान प्रवेश गर्ने छ । पाकिस्तान युवा ब्याट्सम्यान बाबर आजम र इंग्ल्यान्ड ओईन मोर्गनको कप्तानीमा मैदान उत्रने छन् ।

पाकिस्तानको ओपनिङ बाबर आजम र फखर जमानले गर्ने छन् । बाबर टि२० आई वरीयताका शीर्ष स्थानका ब्याट्सम्यान हुन् । निरन्तर उत्कृष्ट प्रर्दशन गर्दै आएका बाबर टोलीका प्रमुख ब्याट्सम्यान हुन् । आक्रामक ब्याटिङका लागि परिचित जमानले एकै ओभरमा खेललाई मोड्न सक्छन् ।

मध्यक्रममा हैदर अली, अनुवभी ब्याट्सम्यान सोएब मलिक र मोहम्मद हफिज छन् । घरेलु क्रिकेटमा उत्कृष्ट प्रर्दशनका साथ पाकिस्तानको टोलीमा पहिलो पटक परेका हैदर डेब्यु गर्दै उच्च प्रर्दशन गर्ने सोचमा छन् । विकेटकिपरमा मोहम्मद रिजवान छन् । टेष्टमा उत्कृष्ट प्रर्दशनका साथ पाकिस्तानबाट म्यान अफ द सिरिज चुनिएका रिजवानको मनोबल उच्च छ । इफ्तिखर अहमद फिनिसरको रुपमा रहने छन् ।

इमाद वासिम र सादब खान अलराउन्डरको रुपमा स्थान बनाउन सक्छन् । तीव्र गतिका बलरको रुपमा मोहम्मद आमिर, वहाव रियाज र शाहिन अफ्रिदीको सम्भावना छ । टेष्टमा अपेक्षा अनुसार प्रर्दशन नगरेपनि टि२० आईमा अफ्रिदीबाट ठूलो आशा गरिएको छ ।

यता इंग्ल्यान्डका ओपनर जेसन रोय बायाँ भागको मांशपेशीमा समस्या आउँदा सिरिजबाट बाहिरिएका छन् । रोय बाहिरिदा इंग्ल्यान्डको ओपनिङ युवा ब्याट्सम्यान टम ब्यान्टन र विकेटकिपर जोनी बेयरस्टोरोले गर्ने छन् । तेस्रो नम्बरमा डेविड मलान र चौथो नम्बरमा मोर्गनले ब्याटिङ गर्ने छन् । उत्कृष्ट लयमा रहेका मोर्गनलाई रोक्न पाकिस्तानलाई बलरलाई कठिन पर्न सक्छ ।

पाँचौ नम्बरमा साम विलिङ्ग्स र छैटौं नम्बरमा मोइन अलीको सम्भावना छ । स्पिनरको रुपमा मोइनसँगै आदिल राशिदलाई मैदान उतार्न सक्छ । तीव्र गतिको बलरको रुपमा टम करन, डेविड विल्ली र क्रिस जोर्डनको सम्भावना छ । यी दुई देशबीच कुल १५ टि२० आई खेल भएको छ । जसमा पाकिस्तान ४ खेलमा विजयी हुँदा १० खेलमा पराजित भएको छ । इंग्ल्यान्ड र पाकिस्तान दुबैले आगमी वर्ष हुने टि२० विश्वकपलाई मध्यनजर गर्दै युवा खेलाडीलाई मौका दिएका छन् ।

यस सिरिजमा यी दुबै टोलीलाई टि२० वरीयतामा शीर्ष स्थानमा उक्लिने अवसर छ । २७ महिनासम्म शीर्ष स्थानमा रहेको पाकिस्तान गत बैशाखमा चौथो स्थानमा खस्किएको थियो । अष्ट्रेलिया शीर्ष स्थानमा रहँदा इंग्ल्यान्ड दोस्रो र भारत तेस्रो स्थानमा छन् । खेलाडीलाई पनि टि२० आई वरीयतामा सुधार गर्ने राम्रो अवसर बन्ने छ ।

गतवर्ष इंग्ल्यान्डले पाकिस्तानलाई एकमात्र टि२० आई खेलमा ७ विकेटले हराएको थियो । उक्त सिरिजमा १ सय ७४ रनको लक्ष्य इंग्ल्यान्डले ४ बल अगाडिनै पूरा गरेको थियो । सन् २०१६ मा पाकिस्तानले इंग्ल्यान्डलाई म्यानचेस्टरमै ९ विकेटले हराएको थियो । दोस्रो खेल आइतबार र तेस्रो तथा अन्तिम खेल मंगलबार हुने छ ।