एजेन्सी – पाकिस्तान र इंग्ल्यान्डबीचको तीन टि२० आई सिरिज अन्तर्गत पहिलो खेल वर्षाको कारण नतिजाबिहिन बनेको छ ।

शुक्रबार राती म्यानचेस्टरमा टस हारेर ब्याटिङको निम्तो पाएको इंग्ल्यान्डले १६.१ ओभरमा १३१–६ को अवस्थामा खेल वर्षाको कारण रोकिन पुगेको थियो । वर्षापछि खेल पुन खेल्ने सम्भावना नबनेपछि नतिजा बिहिन बन्न पुगेको थियो । इंग्ल्यान्डका युवा ब्याट्सम्यान तथा ओपनर टम ब्यान्टनले सर्वाधिक ७१ रनको योगदान दिए ।

पहिलो ओभरको पाँचौ बलमा स्पिनर इमाद वासिमले ओपनर जोनी बेयरस्टोलाई २ रनमा कट एण्ड बोल्ड आउट गरेका थिए । जुन समय इंग्ल्यान्डले ३ रन मात्र जोडेको थियो । ब्यान्टन र डेविड मलानले दोस्रो विकेटका लागि ७१ रनको साझेदारी गर्दै इंग्ल्यान्डलाई राम्रो सुरुवात दिलाए ।

दशौं ओभरको तेस्रो बलमा मलान २३ बलमा २ चौका सहित २३ रनमै रन आउट हुन पुगेसँगै इंग्ल्यान्डले लगातार विकेट गुमाउन पुगेको थियो । स्पिनर शादब खानको १३ औं ओभरको तेस्रो बलमा ठूलो सट खेल्ने धुनमा ब्यान्टन टप एज लागेर एस्ट्रा कभरमा इमाद वासिमबाट ४२ बलमा ४ चौका र ५ छक्का सहित ७१ रनमा क्याच आउट भएपछि पाकिस्तानले राम्रो पूनरागमन गरेको थियो । ब्यान्टनले आफ्नो टि२० आई करिअरको पहिलो अर्धशतक ३३ बलमा पूरा गरेका थिए ।

१४ औं ओभरको अन्तिम बलमा कप्तान ओईन मोर्गनलाई इफ्तिखर अहमदले १० बलमा १ चौका र १ छक्का सहित १४ रनमा एलबिडब्लू आउट गर्दा इंग्ल्यान्ड ११८–४ को अवस्थामा पुगेको थियो । १५ औं ओभरको चौथो बलमा मोइन अलीलाई शादबले विकेटकिपर मोहम्मद रिजवानबाट ८ रनमा क्याच गराएपछि इंग्ल्यान्ड दबाबमा परेको थियो । लुईस ग्रेगरीलाई इमादले २ रनमा स्टम्पिङ आउट गराउँदै इंग्ल्यान्डलाई १५.३ ओभरमा १२३–६ को कमजोर अवस्थामा पुर्याएका थिए ।

साम विलिङ्ग्स ३ र क्रिस जोर्डन २ रनमा खेलिरहेको अवस्थामा खेल वर्षाको कारण रोकिएको थियो । स्पिनर शादब खानले ४ ओभरमा ३३ रन खर्चेर २ विकेट लिए । इमाद वासिमले ४ ओभरमा ३१ रन खर्चदै २ विकेट हात पारे । इफ्तिखर अहमदको नाममा १ विकेट रह्यो । दोस्रो टि२० आई खेल आइतबार म्यानचेस्टरमा हुने छ ।