एजेन्सी– पाकिस्तानविरुद्ध तेस्रो टेस्टमा बायाँ हातको कुममा लागेको चोटका कारण इंग्ल्यान्डका युवा स्टार ओली पोप मैदान बाहिर रहने भएका छन् ।

चोट गम्भीर रहेका कारण शल्यक्रिया गर्नुपर्ने भएपछि २२ वर्षीय मध्यक्रम ब्याट्सम्यान ओली चार महिना मैदान बाहिर रहने भएका हुन् । पाकिस्तानविरुद्ध तेस्रो तथा अन्तिम टेष्टमा साउथह्याप्टनमा चौथो दिन स्टुअर्ट ब्रोडको पहिलो ओभरको दोस्रो बलमा चौका बचाउने क्रममा उनी घाइते हुन पुगेका थिए ।

ओलीको आगामी दुई हप्ताभित्र शल्यक्रिया हुने छ । इंग्ल्यान्डले २०२१ मा श्रीलंकाविरुद्ध टेष्ट सिरिज खेल्ने छ । उक्त समय सम्म ओली पूर्णरुपमा ठिक हुने आशा गरिएको छ । ओली टेष्टमा इंग्ल्यान्डका एक महत्वपूर्ण ब्याट्सम्यान हुन् । गत जनवरीमा दक्षिण अफ्रिकाविरुद्ध १ सय ३५ रनको उत्कृष्ट इनिङ खेलेका थिए ।

त्यस्तै अघिल्लो महिना वेस्टइन्डिजविरुद्ध तेस्रो टेष्टमा म्यानचेस्टरमा ९१ रन जोडेका थिए । पाकिस्तानसँगको पहिलो टेष्टमा इंग्ल्यान्ड २ सय १९ रनमा अल आउट हुँदा ओलीले ६२ रनको महत्वपूर्ण इनिङ खेलेका थिए ।

सन् २०१८ मा भारतविरुद्ध डेब्यु गरेका ओलीले १३ टेष्टमा १ शतक र ५ अर्ध शतक सहित कुल ६ सय ४५ रन बनाएका छन् । ओलीको खेल्ने शैली इंग्ल्यान्डका पूर्व सफल ब्याट्सम्यान इयान बेललाई झल्काउने क्रिकेट विज्ञहरु बताउँछन् ।