एजेन्सी – नेपाली लेग स्पिनर सन्दीप लामिछाने सम्मिलित जमैका तलावाजले क्यारेबियन प्रिमियर लिग (सिपिएल) को १८ औं खेलमा सेन्ट किट्स एण्ड नेभिस प्याट्रियटसविरुद्ध खेल्दैछ ।

खेल नेपाली समय अनुसार शनिवार मध्यराती १२ बजेपछि क्विन्स पार्क ओभलमा सुरु हुनेछ । जमैका सिपिएलको अंक तालिकामा ५ खेलमा ३ हार र २ जित सहित पाँचौ स्थानमा छ । सेन्ट किट्स ५ खेलमा १ मा जित र ४ मा हार सहित २ अंक जोड्दै पुछारमा छ । दुवै टोलीलाई आजको खेल जित्नैपर्ने दबाब छ ।

पुछारमा रहेका यी दुई टोलीबीचको प्रतिस्पर्धा रोमाञ्चक हुने आशा गरिएको छ । जमैकाका स्पिनर सन्दीप, अफगानिस्तानका मुजिब उर रहमानले उच्च प्रर्दशन गरेपनि ब्याट्सम्यान चल्न नसक्दा र तीव्र गतिका बलरको साथ नपाउँदा हार बेहोर्दै आएको छ । जमैका ट्रीनबेगो नाइट राइडर्स विरुद्ध ७ विकेटले पराजित भएको थियो ।

दोस्रो हार गुयाना एमेजन वारियर्सविरुद्ध १४ रनको बेहोरेको थियो । १ सय १९ रनको सामान्य विजयी लक्ष्य पछ्याएको जमैकाले ७ विकेटको क्षतिमा १ सय ४ रन मात्रै बनाउन सक्यो । तेस्रो हार बार्बाडोसविरुद्ध बेहोरेको थियो । उक्त खेलमा १ सय ४९ रनको लक्ष्य पछ्याउने क्रममा जमैकाले ९ विकेटको क्षतिमा १ सय १२ रन बनाएको थियो ।

जमैका कुनैपनि ब्याट्सम्यानले यस सिजनको सिपिएलमा ठूलो इनिङ खेल्न सकेका छैनन् । ओपनर चाडविक वाल्टनले सुरुवाती पाँच खेलमा क्रमशः २, ०, ०, १ र १० रनमा आउट भएका छ्न । अर्का ओपनर ग्लेन फिलिप्सले ०, २६, ०, ५८ र ४४ रन बनाएका छन् ।

कप्तान रोभमान पावेलको खराब लय अर्को ठूलो चिन्ताको विषय हो । पावेलले पाँच खेलमा ४, २, २३, ८ र २६ रनमा आउट भएका छन् । जर्मेन ब्ल्याकवुडले २८ र २३ रन जोडेका छन् । तल्लोक्रमका आसिफ अलीको प्रर्दशन पनि निराशजनक छ । अलीले पाँच खेलमा २, ३, १४, २२ र ४७ रन जोडेका छन् ।

चोटसँग जुधिरहेका आन्द्रे रसेलले मध्य प्रर्दशन गरेका छन् । रसेलले खेलेका चार खेलमा २३, ५२, २५ र १६ रन जोडेका छन् । मुजिबले ५ खेलमा १२ विकेट लिदै शीर्ष स्थानमा रहेका छन् । सन्दीपले ५ खेलमा ७ विकेट लिएका छन् ।

जमैका तीव्र गतिका बलरको प्रर्दशन पनि राम्रो छैन । तीव्र गतिका बलर कार्लोस व्रेथवेट र ओशान थोमसले प्रर्दशन अपेक्षा अनुसार छैन । ब्रायन लारा र क्विन्स पार्क ओभल दुवैको पिच स्पिनर उपयोगी हुँदा तीव्र गतिका बलरले संघर्ष गरिरहेका छन् । सन्दीपले सेन्ट किट्सविरुद्ध पनि उत्कृष्ट प्रर्दशनलाई निरन्तरता दिने अनुमान गरिएको छ ।

सेन्ट किट्समा जोशुवा डा शिल्भा, बेन डंक, इभिन लुईस, क्रिस लिन र दीनेश रामदिन उसका ब्याट्सम्यान हुन् । बलरको रुपमा शेल्डन कटरेल, अल्जारी जोशेफ, ईश सोधी र सोहेल तनवीर छन् । क्रिस लिन र इभिन लुईस जस्ता चर्चित ब्याट्सम्यान चल्न नसक्नु उस्को पनि चिन्ताको विषय बनि रहेको छ ।

यी दुई टोलीबीच सिपिएलमा कुल ११ खेल भएको छ । जसमा जमैका ५ खेलमा विजयी हुँदा ६ खेलमा पराजित भएको थियो । गत वर्षका दुवै खेलमा जमैका पराजित हुन पुगेको थियो ।