एजेन्सी – इंग्ल्यान्ड र पाकिस्तानबीचको तीन खेलको टि२० आई सिरिज अन्तर्गत दोस्रो खेल आज म्यानचेस्टरमा हुँदैछ । खेल नेपाली समय अनुसार साँझ ७ बजेपछि सुरु हुनेछ ।

शुक्रबार राती भएको पहिलो खेल वर्षाको कारण नतिजाबिहिन बनेको थियो । दुवै टोलीलाई सिरिज जित्ने आशा कायमै राख्न आजको खेल जित्नै पर्ने हुन्छ । पहिलो खेलमा इंग्ल्यान्ड १६.१ ओभरमा १३१–६ को अवस्थामा खेल वर्षाको कारण रोकिन पुगेको थियो । इंग्ल्यान्डका युवा ब्याट्सम्यान तथा ओपनर टम ब्यान्टनले ७१ रनको उत्कृष्ट इनिङ खेलेका थिए । ब्यान्टन दोस्रो खेलमा पनि नायक बन्न सक्छन् ।

इंग्ल्यान्ड कप्तान ओईन मोर्गनसँगै ओपनर जोनी बेयरस्टो र डेविड मलानलाई ठूलो इनिङ खेल्नु पर्ने हुन्छ । पहिलो खेलमा बेयरस्टो २, मलान २३ र मोर्गन १४ रनमा आउट भएका थिए । स्पिनर शादब खान र इमाद वासिमले २–२ विकेट लिएका थिए । पाकिस्तानका तीव्र गतिका बलर मोहम्मद आमिर, शाहिन अफ्रिदी र हरिस रउफ विकेट बिहिन बनेका थिए । आजको खेलमा पाकिस्तानले युवा ब्याट्सम्यान हैदर अलीलाई डेब्यु गराउन सक्छ । हैदर आक्रामक ब्याटिङका लागि परिचित छन् ।

इंग्ल्यान्डको ओपनिङ ब्यान्टन र बेयरस्टोले गर्ने छन् । तेस्रोमा डेविड मलान, चौथो मोर्गन र पाँचौ नम्बरमा मोईन अलीले गर्ने छन् । छैटौं नम्बरमा साम विलिंग्सले गर्ने छन् । इंग्ल्यान्डले मध्यगतिका बलर लुईस ग्रेगरीको स्थानमा डेविड विल्लीलाई मैदान उतार्न सक्छ । स्पिनर आदिल राशिदसँगै तीव्र गतिका बलर टम करन, क्रिस जोर्डन, सकिव महुम्मदलाई निरन्तरता दिन सक्छ ।

पाकिस्तानको ओपनिङ फखर जमान र कप्तान बाबर आजमले गर्ने छन् । यी दुवै ओपनरको प्रर्दशन निकै महत्त्वपूर्ण हुनेछ । टि२० आई वरीयताका नम्बर वान ब्याट्सम्यान बाबरबाट ठूलो इनिङको आशा गरिएको छ । तेस्रो नम्बरमा अनुभवी सोएब मलिक र चौथोमा हैदर अलीको सम्भावना छ । हैदरलाई डेब्यु नगराएको खण्डमा मोहम्मद हफिज मैदान उत्रनेछन् ।

पाँचौ नम्बरमा शादब खान र छैटौंमा विकेटकिपर मोहम्मद रिजवानको सम्भावना छ । सातौ नम्बरमा इमादले गर्ने छन् । तीव्र गतिको बलरको रुपमा आमिर, शाहिन अफ्रिदी र वहाब रियाजको सम्भावना छ । पहिलो खेलमा ३ ओभरमा ३२ रन खर्चेका रउफलाई बेन्चमा राख्दै रियाजलाई मौका दिन सक्छ ।