एजेन्सी– पाकिस्तानले तेस्रो तथा अन्तिम टि२० आई खेलमा घरेलु टोली इंग्ल्यान्डलाई ५ रनले पराजित गर्दै सिरिज बराबरीमा सकाएको छ ।

पाकिस्तानको जितसँगै तीन टि२० आई सिरिज १–१ को बराबरीमा सकिएको छ । यस अघि पहिलो खेल वर्षाको कारण नतिजा विहिन हुँदा दोस्रो खेलमा इंग्ल्यान्ड ५ विकेटले विजयी भएको थियो । जितका लागि १ सय ९१ रनको विजयी लक्ष्य पछ्याएको इंग्ल्यान्डले निर्धारित २० ओभरमा ८ विकेटको क्षतिमा १ सय ८५ रन बनाउन सक्यो ।

इंग्ल्यान्डका अलराउन्डर मोईन अलीले सर्वाधिक ६१ रनको योगदान दिए । अन्तिम विकेटका रुपमा १९ औं ओभरको पाँचौ बलमा वहाब रियाजले कट एण्ड बोल्ड आउट गर्नुअघि मोइन अलीले ३३ बलमा समान ४ चौका र छक्का प्रहार गरे । पहिलो ओभरको चौथो बलमा ओपनर जोनी बेयरस्टोलाई शाहिन अफ्रिदीले शून्यमा बोल्ड आउट गरे । चौथो ओभरको पाँचौ बलमा डेविड मलानलाई इमाद वासिमले ७ रनमा फखर जमानबाट क्याच गराएका थिए ।

सातौं ओभरको अन्तिम बलमा कप्तान ओईन मोर्गन १० रनमा रन आउट भएपछि इंग्ल्यान्ड दबाबमा परेको थियो । आठौं ओभरको पाँचौ बलमा हरिस रउफले ओपनर टम ब्यान्टनलाई ३१ बलमा ८ चौका सहित ४६ रनमा एलबिडब्लूआउट गरे । साम विलिंग्स २६ र लुईस ग्रेगरी १२ रनमा आउट भए । पकिस्तानका शाहिन अफ्रिदीले ४ ओभरमा २८ रन खर्चेर २ विकेट लिए । वहाब रियाजले ४ ओभरमा २६ रन खर्चेर २ विकेट लिए । हरिस रउफ र इमाद वासिमको नाममा १–१ विकेट रह्यो ।

त्यसअघि म्यानचेस्टरमा टस हारेर पहिला ब्याटिङ गरेको पाकिस्तानले निर्धारित २० ओभरमा ४ विकेटको क्षतिमा १ सय ९० रन बनाएको थियो । पाकिस्तानका मोहम्मद हफिजले ५२ बलमा ४ चौका र ६ छक्का सहित ८६ रनमा अविजित रहँदै उत्कृष्ट इनिङ खलेका थिए । हफिजले दोस्रो खेलमा पनि उत्कृष्ट अर्ध शतक प्रहार गरे ।

दोस्रो ओभरको पहिलो बलमा फखर जमानलाई मोईन अलीले १ रनमा बोल्ड आउट गरे । पाँचौ ओभरको दोस्रो बलमा कप्तान बाबर आजमलाई टम करनले २१ रनमा बोेल्ड आउट गरे । बाबरले १८ बलमा ३ चौका प्रहार गरे ।

त्यसपछि क्रिजमा आएका हैदर अलीले कीर्तिमानी अर्ध शतक प्रहार गरे । पाकिस्तानको सियिनर टोलीबानट डेब्यु खेल खेलेका युवा ब्याट्सम्यान हैदरले ३३ बलमा ५ चौका र २ छक्का सहित ५४ रनको योगदान दिए । उनी पाकिस्तानबाट टि२० आई डेब्युमा अर्ध शतक प्रहार गर्ने पहिलो ब्याट्सम्यान बनेका छन् । हैदरलाई १५ औं ओभरको दोस्रो बलमा क्रिस जोर्डनले बोल्ड आउट गरे ।

हैदर र हफिजले तेस्रो विकेटका लागि एक सय रनको शतकीय साझेदारी गर्दै बलियो योगफलको आधार तय गरेका थिए । शादब खान ११ बलमा २ चौका सहित १५ रनमा आउट भए । इंग्ल्यान्डका क्रिस जोर्डनले ४ ओभरमा २९ रन खर्चेर २ विकेट लिए । मोइन अली र टम करनले १–१ विकेट लिए । पाकिस्तानका मोहम्मद हफिज प्लेयर अफ द सिरिज र म्यान अफ द म्याच दुबै चुनिए ।

इंग्ल्यान्डले अव सेप्टेम्बर ४, ६ र ८ मा अष्ट्रेलियाविरुद्ध तीन टि२० आई सिरिज खेल्ने छ । सेप्टेम्बर ११, १३ र १६ मा इंग्ल्यान्ड र अष्ट्रेलियाबीच तीन ओडिआई सिरिज खेल हुने छ । पाकिस्तानको भने तत्काल कुनै अन्तर्राष्ट्रिय खेल छैन ।