एजेन्सी – विश्व क्रिकेटका दुई पावर हाउस अष्ट्रेलिया र इंग्ल्यान्डबीचको तीन खेलको टि२०आई सिरिज अन्तर्गत पहिलो खेल आज हुँदैछ । खेल नेपाली समय अनुसार राती १०ः४५ पछि साउथह्याप्टनमा सुरु हुनेछ ।

अष्ट्रेलिया टि२० आई वरीयतामा शीर्ष र इंग्ल्यान्ड दोस्रो स्थानमा छन् । अष्ट्रेलियालाई शीर्षस्थानमा कायम राख्न यस सिरिजमा चुनौती छ । इंग्ल्यान्डलाई शीर्षस्थानमा उक्लिने अवसर रहेको छ । अष्ट्रेलियामा आक्रामक ब्याट्सम्यानको रुपमा डेविड वार्नर, आरोन फिन्च र ग्लेन म्याक्सवेल छन् । यता इंग्ल्यान्डमा कप्तान ओईन मोर्गन, टम ब्यान्टन र जस बटलर पनि त्यतिनै आक्रामक ब्याटिङका लागि परिचित छन् ।

अष्ट्रेलियाको टोलीमा वर्तमान समयका सर्वाधिक तीव्र गतिमा बलिङ गर्न सक्ने योर्करका सिपालु मिचेल स्टार्क हुँदा इंग्ल्यान्डमा वाउन्सर परिचित जोफ्रा आर्चर छन् । विश्व क्रिकेटका उत्कृष्ट यी दुई टोलीबीचको प्रतिस्पर्धा कडा हुने अनुमान गरिएको छ ।

ओपनर आरोन फिन्च र डेभिड वार्नरले टोलीलाई राम्रो सुरुवात दिन प्रयास गर्ने छन् । आक्रामक ब्याटिङका लागि चर्चित यी दुई ब्याट्सम्यान क्रिजमा लामो समय टिके विशाल योगफल अष्ट्रेलियाले सहजै बनाउन सक्छ । तेस्रो नम्बरका स्टिभ स्मिथ र चौथो नम्बरमा मार्नस लाबुसेनको सम्भावना छ ।

टेष्ट र ओडिआईमा निरन्तर उच्च प्रर्दशन गर्दै आएका लाबुसेन टि२० आईको डेब्युको प्रतिक्षामा छन् । अभ्यास टि२० खेलमा शतक प्रहार गरेका लाबुसेनलाई अष्ट्रलियाले मिचेल मार्शको स्थानमा मौका दिने सम्भावना देखिन्छ । पाँचौ नम्बरमा अष्ट्रेलियाले आक्रामक ब्याट्सम्यान ग्लेन म्याक्सवेललाई मैदान उतार्ने सम्भावना छ ।

म्याक्सवेलबाट उत्कृष्ट आक्रामक रुपमा ठूलो इनिङको आशा गरिएको छ । लाबुसेनलाई मौका नदिएको खण्डमा चौथो नम्बरमा उतार्ने छ । विकेटकिपर एलेक्स केरी र अलराउन्डर मार्कस स्टोइनिसले तल्लोक्रममा ब्याटिङ गर्ने छन् । यी दुवै राम्रो लयमा रहेका छन् ।

स्पिनरमा एडम जम्पाको स्थान पक्कापक्कि छ । नाथन लायन र एस्टन अगर मध्य एकलाई मौका दिने छ । यता तीव्र गतिको बलरको रुपमा मिचेल स्टार्क र प्याट कमिन्सको स्थान पनि बलियो हुँदा रिले मेरीडिथ र ड्यानियल स्याम्स मध्य एकको डेब्युको सम्भावना छ ।

यता घरेलु टोली इंग्ल्यान्डले टि२० टोलीमा जो रुटलाई मौका दिएको छैन । इंग्ल्यान्डको रणनीति आगमी विश्वकप केन्द्रित देखिन्छ । ओपनिङ युवा ब्याट्सम्यान टम ब्यान्टन र जोनी बेयरस्टोले गर्ने छन् ।

पाकिस्तानबिरुद्धको सिरिजमा उच्च प्रर्दशन गरेका युवा आक्रामक ब्याट्सम्यान ब्यान्टनबाट इंग्ल्यान्डले त्यस्तै सुरुवात चाहान्छ । तेस्रोमा डेविड मलान र चौथो नम्बरमा कप्तान ओईन मोर्गनले गर्ने छन् । मोर्गनको ब्याटिङ इंग्ल्यान्डलाई निकै महत्वपूर्ण हुने छ । उत्कृष्ट लयमा रहेका मोर्गनलाई रोक्न अष्ट्रेलियाका बलरलाई कठिन पर्न सक्छ ।

पाँचौ नम्बरमा विकेटकिपर जस बटलरले गर्ने छन् । पाकिस्तानविरुद्ध टेष्ट सिरिजमा ‘म्यान अफ द सिरिज’ चुनिएका बटलर टि२० सिरिजमा त्यहि प्रर्दशनलाई निरन्तरता दिन खोज्ने छन् । छैटौं नम्बरमा मोईन अलीले ब्याटिङ गर्ने गर्दछन् ।

इंग्ल्यान्डले तीव्र गतिका बलरका रुपमा क्रिस जोर्डन, जोफ्रा आचर र मार्क वुडलाई उतार्न सक्छ । स्पिनरमा आदिल राशिद हुने छन् । ब्यक्तिगत कारण बेन स्टोक्स टोलीमा उपलब्ध नहुँदा साम करनलाई अलराउन्डरको रुपमा खेलाउन सक्छ ।

पछिल्लो पटक यी दुई देशले सन् २०१८ मा एक मात्र टि२० आई खेल खेलेका थिए । जसमा इंग्ल्यान्ड २८ रनले विजयी भएको थियो । उक्त खेलमा इंग्ल्यान्डले ५ विकेटको क्षतिमा २ सय २१ रन बनाएको थियो । लक्ष्य पछ्याउने क्रममा अष्ट्रेलिया १ सय ९३ रनमा समेटिएको थियो ।

अष्ट्रेलिया र इंग्ल्यान्डबीच हालसम्म कुल १६ टि२० आई खेल भएका छन् । जसमा अष्ट्रेलिया ९ खेलमा विजयी हुँदा ६ खेलमा पराजित भएको छ । एक खेल नतिजा विहिन भएको थियो । अष्ट्रेलिया कप्तान आरोन फिन्च टि२० आई करिअरमा दुई हजार रन पूरा गर्न ११ रनले पछि छन् ।

फिन्चले सन् २०१३ मा इंग्ल्यान्डविरुद्ध १ सय ५६ रनको उत्कृष्ट इनिङ खेलेपछि अष्ट्रेलियाले ६ विकेटको क्षतिमा २ सय ४८ रन बनाएको थियो । फिन्चले पछिल्लो पटक इंग्ल्यान्डविरुद्ध सन् २०१८ मा ८४ रन जोडेका थिए । फिन्च इंग्ल्यान्डलाई घातक बन्न सक्छन् ।