एजेन्सी– बायाँ हाते ब्याट्सम्यान डेविड मलानको अर्ध शतकको सहयोगमा पहिलो टि२० आई खेलमा घरेलु टोली इंग्ल्यान्डले अष्ट्रेलियालाई १ सय ६३ रनको मध्यम लक्ष्य दिएको छ ।

साउथह्याप्टनमा टस हारेर ब्याटिङको निम्तो पाएको इंग्ल्यान्डले निर्धारित २० ओभरमा ७ विकेटको क्षतिमा १ सय ६२ रन बनायो । इंग्ल्यान्डका डेविड मलानले ४३ बलमा ५ चौका र ३ छक्का सहित सर्वाधिक ६६ रनको योगदान दिए । मलानलाई १९ औं ओभरको पहिलो बलमा केन रिचर्ड्सनले बाउन्ड्री नजिकै स्टिभ स्मिथबाट क्याच गराए ।

चौथो ओभरको अन्तिम बलमा ओपनर जोनी बेयरस्टोलाई प्याट कमिन्सले मिचेल स्टार्कबाट आठ रनमा क्याच गराए । जुन समय इंग्ल्यान्डले ४३ रन जोडेको थियो । आक्रामक ब्याटिङ गरेका ओपनर जस बटलर स्पिनर एश्टन अगरको आठौं ओभरको पाँचौ बलमा ठूलो सट खेल्ने धुनमा बाउन्ड्री नजिकै कमिन्सको हातबाट ४४ रनमा समातिन पुगे । बटलरले २९ बलमा ५ चौका र २ छक्का प्रहार गरे ।

अगरले नै दशौं ओभरको पाँचौ बलमा युवा ब्याट्सम्यान टम ब्यान्टनलाई कप्तान आरोन फिन्चबाट आठ रनमा क्याच आउट गराउँदै दबाब बढाए । ग्लेन म्याक्सवेलको १२ औं ओभरको पाँचौ बलमा ठूलो सट खेल्ने धुनमा कप्तान ओईन मोर्गन स्टिभ स्मिथबाट ५ रनमा समातिए ।

म्याक्सवेलले १४ औं ओभरको पाँचौ बलमा मोईन अलीलाई एडम जम्पाबाट २ रनमा क्याच गराउँदा इंग्ल्यान्ड १०८–५ को कम्जोर अवस्थामा पुर्याएका थिए । क्रिस जोर्डन १४ र आदिल राशिद १ रनमा अविजित रहे । टम करन ६ रनमा आउट भए ।

अष्ट्रेलियाका स्पिनर एश्टन अगरले ४ ओभरमा ३२ रन खर्चेर २ विकेट लिए । ग्लेन म्याक्सवेलले ३ ओभरमा १४ रन खर्चेर २ विकेट लिए । केन रिचर्ड्सनले ३ ओभरमा १३ रन खर्चेर २ विकेट लिए । प्याट कमिन्सको नाममा १ विकेट रह्यो ।