एजेन्सी – क्यारेबियन प्रिमियर लिग (सिपिएल) को २८ औं खेलमा आज राती सन्दीप लामिछाने सम्मिलित जमैका तलावाजले बार्बाडोस ट्राइडेन्सविरुद्ध खेल्दै छ ।

खेल मध्यराती १२ बजेपछि ब्रायन लारा स्टेडियममा सुरु हुने छ । जमैकालाई तेस्रो स्थानमा उक्लिने झिनो आशा कायमै राख्न आजको खेल जित्नै पर्ने हुन्छ । आजको खेलमा जमैका पराजित भए सेमिफाइनलमा ट्रीनबेगो नाइट राइडर्ससँग प्रतिस्पर्धा गर्ने निश्चित हुने छ । जमैका तेस्रो स्थानमा रहेर सेमिफाइनल खेल्न बाँकी दुई खेलमा फराकिलो अन्तरले जित्नुपर्छ ।

जमैकालाई दुबै खेलको जितले मात्र पुग्दैन । तेस्रो स्थानमा रहेको सेन्ट लुसिया जुक्सले पनि बाँकी दुई खेलमा फराकिलो अन्तरको हार बेहोर्नुपर्ने हुन्छ । जुक्स बाँकी दुई खेल मध्य एक खेलमा विजयी भएको खण्डमा जमैकाको तेस्रो स्थानमा उक्लिने सम्भावना समाप्त हुने छ । बार्बाडोस ९ खेलमा २ मा जित र ७ मा हार सहित पाँचौ स्थानमा रहेर लिग चरणबाटै बाहिरिसकेको छ । अन्तिम खेलमा जितका साथ अन्त्य गर्ने सोचमा बार्बाडोस छ ।

यस सिजनमा अफगानिस्तानका स्पिनर राशिद खानले बार्बाडोसबाट अपेक्षा अनुसार प्रर्दशन गर्न सकेनन् । बार्बाडोसका प्रमुख हतियार राशिदले ९ खेलमा १० विकेट मात्र लिएका छन् ।

सन्दीपले ८ खेलमा ७ इनिङमा बलिङ गर्दै १० विकेट लिएका छन् । जमैका अर्का स्पिनर मुजिब उर रहमानले ८ खेलमा १३ विकेट लिएका छन् । जमैका लागि मुजिब र सन्दीपको जोडिको प्रर्दशन निकै महत्वपूर्ण हुने छ ।

कप्तान रोभमान पवेल, चाडविक वाल्टन, जर्मेन ब्ल्याकवुड, आसिफ अली लगायतका ब्याट्सम्यान चल्न नसक्नु जमैकाको कम्जोरी बनेको छ । जमैका विकेटकिपर ग्लेन फिलिप्स र आन्द्रे रसेल बाहेक अन्यले राम्रो ब्याटिङ गर्न सकेका छैनन् । तीव्र गतिका बलर ओशान थोमस र कार्लोस ब्रेथवेटले पनि अपेक्षा अनुसार प्रर्दशन छैन ।

बार्बाडोसका काइल मेयर्स र जोनसन चार्सलाई छाड्ने हो भने अन्य ब्याट्सम्यानको प्रर्दशन सम्झन लायक छैन । कोरी एन्डरसन, शाई होप, जेसन होल्डर लगायतका प्रमुख ब्याट्सम्यान चल्न सकेका छैनन् । स्पिनर राशिद खानसँगै हेडन वाल्श र मिचेल सान्टनार तीनैले आशा अनुसार प्रर्दशन गर्न नसक्दा साविक विजेता बार्बाडोस लिग चरणबाटै बाहिरिएको छ ।

यसअघि पहिलो खेलमा बार्बाडोसले जमैकालाई ३६ रनले हराएको थियो । जमैका र बार्बाडोसबीच सिपिएलमा कुल १५ खेल भएका छन् । जमैका ८ खेलमा विजयी हुँदा ६ खेलमा पराजित भएको छ ।

अंक तालिका

अपराजित ट्रीनबेगो नाइट राइडर्स ८ खेलमा १६ अंकका साथ शीर्ष स्थानमा छ । दुई खेल खेल्न बाँकी रहेको नाइट राइडसले सेमिफाइनलमा चौथो स्थानमा रहने टोलीसँग प्रतिस्पर्धा गर्ने छ । गुयना एमेजन वारियर्सले लिग चरणका पूरै १० खेल खेलि सक्दा ६ मा जित र ४ मा हार सहित १२ अंक जोड्दै दोस्रो स्थानमा छ ।

दुई खेल खेल्न बाँकी सेन्ट लुसिया जुक्स ८ खेलमा ५ मा जित र ३ मा हार सहित १० अंक जोड्दै तेस्रो स्थानमा छ । लिग चरणका खेल सकिएपछि दोस्रो र तेस्रो स्थानका टोलीबीच दोस्रो सेमिफाइनल खेल हुने छ ।

जमैका ८ खेलमा ३ मा जित र ४ मा हार सहित ७ अंक जोड्दै चौथो स्थानमा छ । एक खेल वर्षाको कारण नतिजा विहिन बनेको थियो । बार्बाडोस ९ खेलमा २ मा जित र ७ मा हार सहित ४ अंकका साथ पाँचौ स्थानमा छ । ९ खेलमा १ मा मात्र जित निकाल्न सकेको सेन्ट किट्स एण्ड नेभिस प्याट्रियटस पुछारमा छ । एक एक खेल बाँकी रहेका पुछारका दुई टोली लिग चरणबाटै बाहिरिएका छन् ।